Novella IX della Giornata I del Decamerone. Sant' Uldarico
Novella IX della Giornata I del Decamerone. Sant' Uldarico
Dije duncue, che ai tëmpes dl prim Re de Cipri, do che la Tiera Santa fova cuncuisteda da Gotfrid de Buglion, iel suzedù, che na nobla seniëura dla Guascogna ie jita a dlieja al Santo Sepolcro. Rueda tl ritorn a Cipri iela unida meltrateda vilanamënter da canaia de jënt. De chësc se n ala abù mpermel zënza deguna cunsulazion, y à pensà de jì dal Re a se lamenté. Ma davia che i fova stat dit per valgun, che si fadia fossa per nia, per gauja, che ël fova de naturel tan fiach y tan da nia, che no medrë l ne castigova cun giustizia l' ufejes fates ai autri, ma n sufriva anzi nfinides fates ad ël de maniera che uniun che ova vel' mueia se la parova via cun i fé n mpermel o dejunëur. La seniëura al audì chësta cossa, zënza speranza de vendëta, per vel cunsulazion de si mueia, se ressolv d' ulëi minciuné la meseria dl Re. Y rueda bradlan dant al Re à dit: "Mi Seniëur, ie ne vënie te ti prejënza per aspité vendëta dla ngiuria, che ie stata fata a mi, ma per sudesfazion de chëla te prëie, che te me nsënies, coche tu sofres chëles che ie aude, che te vën fates a ti, acioche cun l mparé da te ie posse cumpurté pazientamënter la mia, che Idie sà, sce l pudësse fé, gën dunëssi a ti, che te ies tan bon de purté." L Re che ntlëuta fova stat tan pëigher y fret, sciche l se descedëssa dal suenn, à scumencià dala ngiuria fata a chësta seniëura, che à vendicà rigorosamënter, ie deventà rigorëusiscim persecutor d' uniun che contra l' unëur dla curona cumetëssa velch da moinlà.