Při studničcy

nadpis	Při studničcy
awtor	Jakub Bart-Ćišinski
lěto
žórło	luzice.euweb.cz
licenca	public domain
nota	stary prawopis

    We łukach studnička so khowa,
    Z njej' žórleško so kužoli -
    K njej wabi mje, hdyž na mni kowa
    Swět a so z hidu puzoli.

    A parla ze dna běła stupa,
    - Přez łuki ćehnje ćichota -
    Hdyž spěwnu' šijku rock sej kupa
    A z dźakom spěwk ji ćikota.

    A módre zwónčki z waha zwonja
    Ji z boka kěrluš lubozny,
    A hwězdy z njebjes do njej' kłonja -
    Hač na dno błyskot hordozny -

    Rad sydam sam tam při studničcy
    A hladam, słucham hodźiny,
    Hač sylza błysknje přez zerničcy.
    A pokoj majka nutriny.

    A boža móc a boža lubosć
    Mi z kuzłom mysle jimatej,
    Zo pěseń z jasnym hłosom wurosć
    Mi dyrbi z duše wyskatej'.