ಮಾನಾದಿಗೆದ ಗುರ್ಕಾರ್ಲೆನ ಪಾತೆರ
 |
 |
|
ನಮ್ಮ‌ಪೆರ್ಮೆದ ಬಾಸೆ, ಕಲೆ, ಕಟ್ಟುಕಟ್ಟಲೆನ್ ಪಚ್ಚೆ ಪಜಿರಾದ್ ಒರಿಪಾದ್, ಬುಳೆಪಾದ್ ದುಂಬುದ ಪೀಳಿಗೆದ ಅಡಿಪಾಯ ಗಟ್ಟಿ‌ಮಲ್ಪುನ ಮಾಮಲ್ಲ ಉದ್ದೇಶ, ಜವಾಬ್ದಾರಿ ನಂಕ್ ಉಂಡು. ಈ ದೃಷ್ಟಿಡ್ ತುಳು ಬಾಸೆಡ್ ಜೋಕುಲೆ ಪದ ಸಾಹಿತ್ಯೊಡು ಕೃಷಿ ಮಲ್ಪೊಡು ಪಂಡ್‌ದ್ ತುಳುವೆರೆ ಚಾವಡಿ ಒಂಜಿ ಪೆಜ್ಹ ದೀತ್ಂಡ್.
UNESCO ಸಂಸ್ಥೆ ತುಳು ಬಾಸೆದ ಬಗ್ಗೆ ಬರೆತಿನ ಪಿರಾಕ್ ದ ಬರವುದ ಪ್ರಕಾರ ತುಳುಬಾಸೆ ಬೇಗೊಡೆ ಅವಸಾನ ಆಪುನ ಬಾಸೆಂದ್ ನಮ ನೆ‌ನಪಾಂದಿನ ವಿಷಯೊನು ಪಾರಾದ್ ಬುಡ್ತ್ಂಡ್. ನಮ್ಮ‌ಬಾಸೆ ಅಂಚ ಆಪುಜಿ. ತುಳು ಬಾಸೆದ ಮಿತ್ತ್ ಬೆನ್ನಿ ಬೆನ್ಪುನ ಸಾಹಿತಿಲು ವಿದ್ವಾಂಸೆರ್, ಸಂಘ ಸಂಸ್ಥೆಲು ಬೆರಿ ಬಗ್ಗಾದ್ ಅಲ್ಪಲ್ಪ ಚಾಕಿರಿ ಮಲ್ತೊಂದುಲ್ಲೆರ್ ಪನ್ಪಿನ ಮಲ್ಲ ಪೆರ್ಮೆದ ವಿಷಯ. ಸರಕಾರ ನನಲಾತ್ ಉಮೇದ್ ಕೊರ್ಪುನ ದೃಷ್ಟಿಡ್ ಸಾಕಾರ ಕೊರೊಡುಂದ್ ಪನ್ಪಿನ ಮಾತೆರ್ನ್‌ ಮನಸ್ಸ್ದ ಬೇನೆನ್ ಅಪಗಪಗ ಅಲ್ಪಲ್ಪ ಸಂಘ ಸಂಸ್ಥೆದ ಪರವಾದ್ ತೆರಿಪಾವೊಂದುಂಡು.
ಇಂಗ್ಲಿಷ್ ಬಾಸೆದ ಬದಲ್ ನಮ್ಮ ಅಪ್ಪೆ ಬಾಸೆದ ಪೊರ್ಲುನು ಲತ್ತ್ ತಿರ್ಲ್ ಮನಸ್ಸ್‌ಗೇ ದಿಂಜಾಂಡ ಫಲ ಬರು ಪನ್ಪಿನ ಸಾಹಿತಿಲು, ವಿದ್ವಾಂಸೆರೆನ ಅಭಿಪ್ರಾಯೊನು ಕಾರ್ಯರೂಪೊಗು ಕನವೊಡು ಪನ್ಪಿನ ಮಾನ್ಯ ಸತೀಶ್ ಅಗ್ಪಲರೆನ ದೂರದೃಷ್ಟಿದ ಫಲನೇ ಇನಿ ಬಿಡುಗಡೆ ಆಪುನ ಜೋಕುಲೆ ಪದೊಕುಲು ಬೂಕು ಸಾಕ್ಷಿ ಆದುಂಡು. ಮೂಲ ಬಾಸೆಡ್ ತುಳು ಪದಕುಲು ಜೋಕುಲೆನ ನಾಲೈದ ಕೊಡಿಟ್ಟ್ ಬರೊಡುಂದ ಪಂಡ್‌ದ್ ದುಂಬುಗ್ ಚಿತ್ರರೂಪೊಡು, ದೃಶ್ಯ ರೂಪೊಡು ಮಿಡುಕುಚಿತ್ರ (ಎನಿಮಿಏಶನ್) ರೂಪೊಡು ಬರ್ಪುನ ದೃಷ್ಟಿಡ್ ತುಳುವೆರೆ ಚಾವಡಿದ ಮಾಮಲ್ಲ ಉದ್ದೇಶ ಫಲ ಕೊರೊಡುಂದ್ ಆಸೆಡ್ ಜೋಕುಲೆ ಪದಕುಲು ಬೂಕುನು ಎದುರು ದೀತ.
ಇನಿ ತುಳುನಾಡ್‌ದ ಪೂಜ್ಯ ಸ್ವಾಮೀಜಿಯೆರ್, ಗಣ್ಯೆರ್, ವಿದ್ವಾಂಸೆರ್, ಸಾಹಿತಿನಕುಲು, ಬೆರಿಬಗ್ಗಾದ್ ಬೆನ್ಪಿನ ಕಾರ್ಯಕರ್ತೆರೆನ ಕೂಡಾಟಿಗೆಡ್ ತುಳು ಸಾಹಿತ್ಯಕ್ಷೇತ್ರೊಗು ಕೊಡುಗೆಯಾದ್ ಲೋಕಾರ್ಪಣೆ ಆವೊಂದುಂದು.
ಅಂಚೆನೆ ಬಾಸೆದ ಬುಳೆಚ್ಚಿಲ್ಗ್ ಒಂಜತ್ತ್ ಒಂಜಿ ರೀತಿಡ್ ಚಾಕಿರಿ ಮಲ್ತಿನ ಮಾಮಲ್ಲ ತುಳುವೆರೆಗ್ ತುಳುನಾಢ್ದ ಸಿರಿ ಪ್ರಶಸ್ತಿ ಮಾನಾದಿಗೆ ನಡಪುನ‌ಕುಷಿತ್ತ ವಿಚಾರ. ತುಳುವಪ್ಪೆನ ತೇರ್ ಒಯಿಪುನ ಈ ಪುಣ್ಯ ಕಾರ್ಯೊಗು ಕೈ ಜೋಡಿಸಾಯಿನ ಪೂಜ್ಯ ಸ್ವಾಮೀಜಿಯೆರೆಗ್, ಗಣ್ಯೆರೆಗ್, ವಿದ್ವಾಂಸೆರೆಗ್, ಸಾಹಿತಿ ನಕ್ಲೆಗ್ ಬೊಕ್ಕ ಚಾವಡಿದ ಅಭಿಮಾನಿ ಬಳಗೊಗು, ಸದಸ್ಯೆರೆಗ್ ಮಾತೆರೆಗ್ಲ ದಿಂಜಿಉಡಲ್ದ ಎಡ್ಡೆಪ್ಪು ಬಯಕೊಂದುಲ್ಲ.
ಪುರುಷೋತ್ತಮ ಚೇಂಡ್ಲಾ
ಮಾನಾದಿಗೆದ ಗುರ್ಕಾರ್ಲು
ತುಳುವೆರೆ ಚಾವಡಿ ಬೆಂಗಳೂರು.
ಜೋಕುಲೆ ಉಜ್ಜಾಲ್ iv
