This page has been proofread.
31
mǎ-tuo̿i, 12.
Di̿ 12 Cióng.
- Ǔ-cì-sî Iǎ-Sú da̿u úing-sĭ-nì giǎng mà-ciě châing-di̿-gua̿, hă-sáing bŭ-gṳě, ciū nṳ̆ mà-ciě lâ̤ iè.
- Huă-lī-so̿ nêng chū-gi̿ng, ciū iáu Iǎ-Sú uā, Nì gâ̤ hă-sáing ca̿ úing-sĭ-nì ēng gǒ̤ng ca̿ gâ̤ dī.
- Iǎ-Sú uā, Cě̤ng-chîng Duōi-pĭ iáu gáing gṳ̀ gâ̤ nêng bŭ-gṳě gâ̤ sî-hē ca̿ gâ̤ dī, nì gu̿ ēng-nǎing nāng-gua̿ à?
- Duōi-pĭ nì Ciōng-Di̿ gâ̤ chio̤̿, iè bâi-diū gâ̤ biǎng, iŏ̤ng biǎng Duōi-pĭ iáu gáing gṳ̀ gâ̤ nêng dú ēng gǒ̤ng iè, cǒng-lâ̤ ci̿-sí ciū gǒ̤ng iè.
- Lṳ̆-huă sṳ́-di̿ gi̿-diū ci̿-sí da̿u dāing-di̿ ngà̤ úing-sĭ-nì, sī mǎu cò gâ̤, nì iǎ ēng-nǎing nāng-gua̿ à?
- Uòi iáu nì uā, Iŏ̤ng-di̿ iǔ cì-ciă nêng piāng dāing ga̿ing duo̿i.
- Se̿ng-géng-di̿ uā, Uòi o̿ ta̿i nêng kǒ̤-lǐng gâ̤ dī, ēng o̿ hṳ̿ing-ci̿ gâ̤ dī, nì lâ̤ měng-bà̤ iŏ̤ng cì gṳ̿ dī sū-mū i̿-su̿, ciū mài nà mǎu cò gâ̤ nêng uā sī iǔ cò.
- Éng-ṳē nêng gâ̤ Gṳ̌ing iǎ sī úing-sĭ-nì gâ̤ Cṳ̌.
- ¶ Iǎ-Sú giǎng ŭ-di̿ ko̤̿, nì lǐ-ba̿i-dǒ̤ng.
- Da̿u ŭ-di̿ iǔ cì-ciă nêng cì ga̿i-tī siǔ kú-tiāu. Iǔ nêng lâ̤ mōng Iǎ-Sú, uā, Úing-sĭ-nì í-bāng, gǒ̤ng, ēng gǒ̤ng? Gṳ̀ gâ̤ séng-i̿ sī o̿ lāu ciă dī ga̿u Iǎ-Sú.
- Iǎ-Sú uā, Nì dǐ-bíng mǎu-lō̤ng sū-mū nêng iǔ cì-tê iông úing-sĭ-nì dǔing hā káng-di̿, nī-di̿ kǎing běng-cie̿ gṳ̀, ēng tuói gṳ́ iòng lâ̤?
- Nêng cǒng piāng iông ga̿ing dì-cîng dă̤ cāi! Gu̿-chu̿ úing-sĭ-nì sī gǒ̤ng ca̿ gâ̤.
- Ciū iáu kú-tiāu siǔ gâ̤ nêng uā, Nì siǔ sṳ́ing chṳ̆ lâ̤. Ŭ ciă nêng nà siǔ sṳ́ing chṳ̆ lâ̤; siǔ ciū hǎu-tiāu, iáu ŭ ga̿i-tī siǔ ĭ-búing.
- Huă-lī-so̿ nêng chṳ̆ ko̤̿, sióng-liông niōng gōng-ciōng-iōng ŏ̤ miè-tiāu Iǎ-Sú.
- Iǎ-Sú dă̤-dí kǐ lâ̤, ciū pī-tiāu ŭ sù-cài, iǔ cèng cāi nêng gáing gṳ̀ ko̤̿; iǔ bāng gâ̤ nêng, Iǎ-Sú dú ta̿i gṳ̀ í hǎu.
