-Kamagong ka gad man gud!- nagsiring an katedratiko waray pakailob han tawa-tawá. -Aber daw; an imo ginngangaranan nga espeho: an bayhon per se, in quantum est superficies,' an lawas nga nahatag hin bayhon, karuyag sidngon, an butáng nga sinasarigan hini nga bayhon, an butáng nga ginhimuan, nga gin-ayád han bahín nga naginbayhon, kay, kaiya na ngahaw, kun an bayhon naghingayad hitó nga bahín han lawas, diri mahihimo kun mawaray lawas. Aber, ano ka hito?
"Ako? Waray!" naisisiring na an waray palad nga waray gud pakakasantop han pakiana, nalulurong na han kadam'an nga bayhon ngan han kadam'an nga bahin nga nalinagatob ha iya mga durunggan; kundi usa nga pagbati hin kaawód say ha iya nakapugóng, ngan puno hin kasakit ngan iginpapamamalhas, sinubay pagliwat an lek- siyon, nagliligot.
-"Sinisiring nga espeho an ngatanan nga bayhon nga pinahamis hin mainggat..."
-Ergo, per te, an espeho amo an bayhon, -nakakawil an katedratiko. -Kun amo, tuhayá ini nga kasamukan. Kun an bayhon amo an espeho, mawawaray labot han pagkaespeho an bisan ano nga aadto ha huyo han bayhon, tungod kay, kun ano an aadto ha luyó waray labot han kinaiya han aadto ha atubangan, id, est, bayhon, quae super faciem est, quia vocatur superficies ea quae supra videtur; nauyon ka o diri nauyon?
An mga buhók han sadáng pairán nga batan'on dinmugang hin panindog daw inalpan hin kusóg nga patitindog.
- Nauyon ka o diri nauyon?
-Bisan la ano, an imo la karuyag, padre, asya an nahuhunahuna niya nga batón kundi waray pagpasipara pagluwás kay nahadlok nga magkatatawa. Amo na an sinisiring nga compromiso ngan amo pa hiya igkita hin sugad kadako. may ada bagá nahuhunahunaan niya nga an mga prayle diri mahihimo uyunan mo bisan la han butáng nga waray hangkag kun diri ka buót nga dida kumuha han ngatanan nga mahihimo gumawás nga kasarakban ngan himurulsan, sumala hiton ira mga asyenda ug mga kurato. Salit an iya angel nga parahuring nagsagdon nga an bisan ano riwahon han iya bug-os nga kalág ngan ha ngatanán nga kabaskog han iya maglinarison nga mga buhók, ngan naisisiring na unta hin usa nga nego! nga mala-
