-Amo an iginsiring ko kan P. Irene; kundi hinmiyom la han iya hin-aaraan nga kamatinapuron ngan magsiring: Dako na ito nga aton nakuha nga bintaha, nahimo ta nga an asunto mahasulsog han tultol nga dalan ha katuhayan, an kaaway nalugos hin pakiatubang yana ha huyayag nga tigi... kun makahimo kitá pakakabig kan D. Custodio basi, ha pagtuman han iya hilig ha pagka-liberal, mag-imporme hin abuyon ha aton, waray ruhaduha an aton pagdarag'an; an Heneral neutral gud la nga tugá.
Inmukoy hi Makaraig.
-Uunanhon ta man pagkabig? -nagpakianá in usa nga waray na pakakahulát.
-Gintutduán ako ni P. Irene hin duhá nga paagi...
-Hi insik Quiroga!- nagsiring in usa
-Ha? Mag-aasá ba ito kan insik Quiroga...
-Usá nga maupay nga regalo! nagsiring hi Pecson
-Labi na, kay napakadungganan.
-Ah, ta, ta, maaram na ako! nahakakatawá: -hi Pepay an baylarina.
-Asya, oo! Hi Pepay an baylarina! -nagsarabat in pira ha ira.
Ini hi Pepay asya in usá nga babayi nga mahusay in tindog nga sinisiring nga sangkay hin duro ni Don Custodio: say hiyá dinadaop han mga kontratista, mga empliyado ngan han mga magsamok kun may karuyag nira makuha nga kaupayan didá han konsihál. Hi Juanito Pelaez nga sangkay man liwat han baylarina, nagsaad nga iya ito panginginanuon; kundi hi Isagani pinmiling han ulo ngan nagsiring nga husto na an pagdangóp kan P. Irene ngan uraura na an pagdaop kan Pepay para hin mga sugád hini nga talinguha.
-Ano man an usa?
-An usa amo an pagdangóp ha usa nga abogado nga manaragdon, hi Sr. Pasta, nga amo an kinaadman nga parakianhan ni don Custodio.
-Gabáy ako hitó, -nagsiríng hi Isagani; -hi Sr. Pasta pilipino ngan nagin-kaklase hitón akon batá. Kundi, uunanhon ta nga umugop ha aton?
-Amo ito an makuri, binmatón hi Makaraig nga nagkikinita kan Isagani; -hi Sr. Pasta may adá usá nga baylarina, aw!... bordadora...
Binmalik pagpiling han ulo ni Isagani.
