magbiling dinhi ha tuna kundi an labi kadako nga kalipayan niya ngahaw, sugad han pulong ni Bentham.
Kun sumulód ka hin pangayád han kinabuhi han ibá
mawawaray ka karrera, di ka makakaasawa ngan waray
mo aabutan nga ano la. Pagbababyaanan ka ngan an
imo ngahaw mga paysano mananagtinawa han imo kakulang hin painoino. Tuod la ha akon, hinunumduman
mo ako ngan magmamatuod ka hiton akon siring kun
pag-ubanon ka na, hin mga uban nga sugad hini!
Ngan an tigurang nga abogado kinmapót han iya halaghag nga mga buhók hamtang nahiyom hin masamdong ngan napiling han ulo.
Senyor, kun pag-ubanon ako hin sugad hito,- binmatón hi Isagani hin sugad kamasamdong, -ngan sumiplat ako han nag-agi ngan kumita ako nga nagtalinguha la ako han baga akon, waray ako pagbuhat han mahihimo ko ngan angay ko himuon para han tuna nga naghatag ha akon han ngatanán, para han mga bungtuhanon nga nakakabulig ha akon, nga ako mabuhi, kun amo ito, senyor, tagsa nga uban magigin-usa ko nga basuní, diri kay himayá, ngan angay ko ikaalo! kát. Ngan katapos hini pagyakan, dinmukó ngan lumakat.
An abogado nahapaudóng didá han iya hinmumutangán, nahapapangangá. Nabati niya an mga pitád nga nagtitiharayo hin hinayhinay, ngan binmalik pag- lingkod nagyiyinakan:
-Kairó, hini nga batan'on! Sugad hitó nga mga panhunahuna sinmulód ha akon ulo hadto nga mga adlaw! Ano pa in karuyag han ngatanán kun makakasiring na nga binuhat ko ini para han akon tuna, iginhalad ko an akon kinabuhi para ha kaupayan han ibá... Pudungpudong nga laurel nga hinumog hin apdo, mga ugá nga dahon nga nakakatabon hin mga tunók ug mga ulod! Diri ito amo an pagkabuhi, diri ito nahatag hin pagkaon, diri nabuburuan hin mga dungóg; an mga laurel diri ngani nahagagamit para paghimo hin tunluban... bisan kalinawan ha pag-ukóy diri... diri nakakapadaóg hin kalipungan; nakakapirdi ngani lugód! An tagsa nga tuna may iya man la lugaringon nga pamatasan sugad nga may lugaringon nga templa han panahon ngan mga sakit, nga lain han panahon ngan mga sakit han iba nga mga tuna!
Katapos magsiring pa:
