ngan mahiyumhiyom an kahimo, ngan ha iya luyo natukdaw in suruguon nga maraksot, makaharadlok, dagway hin manunulay, nangingisog, may dará nga bangkaw nga halapad an suráb ngan mataróm; an mga indiyo nasiring nga amo adto hi Mahoma, an ibá nasiring
nga hi Santiago daw kunó, ambot kay anó; an kainsikan diri man liwát naghahatag hin tuhaytuhay nga kasayuran hini nga sangyaw nga pagkaduhá hin ngaran. Mga binutubutó hin botelya hin tsampan, irintok han
mga kopa, katatawa, asó hin tabako ngan hin baho nga
kinaiya ha mga baláy hin insik, sakot han pebete (linikid nga papel nga dinagkután), apyan, ngan mga konserba hin mga prutas, amo an nakakahitso han ngatanan.
Kanan mandarin an pamiste, nga may gorra nga binurlasan hin tagumon, hi insik Quiroga nagsisinuduysudoy tikang didto ha usa nga ruwáng ngadto na man ha sunód, tikig ngan unat, naniniplat ngadi, ngadto, ha pagináw nga waray hino man nga man-garanon la hin purot. Ngan bisan pa hiya may kinaiyá nga pagtahap han mga sumasaka hiya gihapon nakikigkamót, nadukó ha ibá hin may hiyom nga kalít ngan mapinaubsanon, ha iba may kiot niya nga mainalinsakubon ngan ha ibá na man may dagway niya hin kamaintrimis daw an nasiring:
-Maaram na ako nga inin imo pagkanhi diri tungod ha akon kundi tungod hinin akon panihapon.
Ngan hi insik Quiroga may katadungan. Adto nga senyor nga matambok nga yaná nagdidinayáw ha iya, ngan nagyiyinakan mahatungód han kaangayan hin usa nga konsul nga insik ha Manila, an karuyag niya sidngon nga an angay hitó nga katungdanan diri ibá kundi hi Quiroga, amo hi Sr. Gonzales nga napirma Pitili kun naataki dida ha mga pahayagán han pagpakanhi ha Pilipinas han mga insik. Adton aadto nga may idád na nga nag-uusyuso pagkinita hiton mga butáng, mga surugaan, mga istampa ug ibá pa, ngan nanyayam-id ngan nagyiyinakan hin mga yubit, amo hi D. Timoteo Pelaez, amáy ni Juanito, komersyante nga maaringasa kontra han kompetensya han insik nga nakakaraot han iya pagpakabuhi. Ngan adton usá, ngadto ha unhan, adto nga senyor nga maitom-itom, malapis, mataróm an paniplat ngan hialáng an tawá, amo an bantog nga tagpahayag han kalipungan mahatungod han mga pesos nga mehikano (mikis) nga nakadisgusto hin dako ha usa nga binubuligan ni insik
