miniko nga bagá... naghihipahiyóm hin badyangás.
An pransiskano nga magasá, nga nasabót han kahulugán han hiyom han dominiko, nakaisip pag-utód han balingkutay salit sinmagbang. Gintatahod gud man adá kay ha usá la nga sinyas han iya kamót nangukóy ngaduhá han pagyinakan igo la nga an prayle-artilyero nagwawalás mahatungód hin mga experiencia ngan an eskritor-prayle nagwawangag mahatungód hin mga hombres de ciencia.
-An mga tawo nga may kinaadman, Ben Zayb, sayod ka kun ano? namulong an pransiskano hin tingog nga daw tikang ha lungíb, haros waray kiwakiwa didá han iya linilingkurán, ngan an tuman nakakabakyaw han iya waray na unód nga mga kamót-Kitaa iton tulay didá ha lalawigan nga Puente del Capricho, nga binuhat hin usa namon nga lego, nga waray katima tungod kay sinusnan han mga hombres de ciencia, pinasarig han ira mga aeorias, nga maluya kunó ngan kulang hin dig-on, ngan kitaa! ito nga tuláy inmato han ngatanan nga baha ug mga linog.
-Amo itó, punyales, amo itó an karuyag ko unta pamulungon!-sinmumpay an prayle-artilyero nga pinmukpok didá han butkon han iya lingkuran nga kawayan; amo ito, an Puente del Capricho' ngan an mga tawo nga may kinaadman; amo ito unta an akon gin-ipamurulong, P. Salvi, punyales!
Hi Ben Zayb nahapaukóy, dapít nahapapahiyóm, tingali kun dará hin katahod, o tingali kawaray gud man adá sadáng ibatón, kundi sabuta nga amo hiyá an asya la nga utok nga nanhuhunahuna didto ha Pilipinas. Hi P. Irene natangó han ulo ha pag-abuyon hamtang nahapyod han iya lakwig nga irong.
Hi P. Salvi, adto nga magasá ngan nagdudukót lu- garing kay may panit nga padi, tungód kay hinayunán hadto nga pagpakita hin katalahuran, nagpadayon hin pamulong didá hadto nga pagmingaw:
-Kundi iní diri karuyag sidngon nga waray katadungan hin sugad han kan P. Camorra (amo ini an ngaran han prayle-artilyero). An maraot aadá hitón danaw...
-Matuod itó; dinhi hini nga tuna waráy bisan mausá nga danaw nga hiró-sinmagbang hi donya Victorina
