Salvi kay amo an gobernador ha bahin ha tuluuhan,
angay magdiri hini nga paguwá.
Hi P. Salvi waray la aringasa; diri na-oo, diri man nadiri.
Basi hisabután kun didto ha sakób may mga manunulay o mga espeho, nagsiring hi Simoun,-maupay mapakadto kamo pagkitá hito nga bantugan nga esfinge.
An pangaghat nahatultol ngan kinarawat dayon kundi hirá P. Salvi ngan hi don Custodio baga waray kaupay panhiayuní. Hirá mapakadto ha usa nga feria, makikitampo han kadam'an pagkita la hin mga esfinge ngan mga ulo nga nagyayakan? Maunano an mga indiyo? Basi hirá pakasidngon nga mga tawo nga may adá mga karuyagón ngan mga kasurusnan sugad han ibá... Didá hini hi Ben Zayb, nga makaaragi hin katuhayan kay peryodista, nagsaad nga makikisabot hiya kan Mr. Leeds nga diri anay pasudlon an kadam'an hamtang aadto hirá ha sakób; uraura diri hiya hini tumugot tungod han dako nga dungóg nga ira iginagawad ha pagkadto pagkita, ngan bangin pa ngani diri hirá suktan hin bayad ha pagsulód. Ngan basi pagmatuuran ini nga talinguha nagsiring hi Ben Zayb:
-Kay hunahunaa daw niyo! Kun masuát ko iton iya limbong ha atubangan han kadam'an nga mga indiyo! Makukuhaan hin tinapay ito nga makaluluoy nga Amerikano!
Hi Ben Zayb tawo nga kasingkasingan. Nagkalusád in napulo kagduhá upód an aton mga kilala nga hirá Don Custodio, P. Salvi, P. Camorra, P. Irene, Ben Zayb ngan Juanito Pelaez. Didto hirá pagkahawás han ira mga kotse ha purtahan han feria ha Quiapo.
Makaruruyag an gab-i ngan maribhong an dagway han plasa. Tungód han kamahaliwanong han gab-i ngan han makawiwili nga bulan ha Enero, an feria punó hin tawo nga nagpakadto pagkitá, pagpakita ngan pagkalipay. An mga musiká didá han mga kosmorama ngan han mga sugá didá han mga paról amo in naalap han kamarugyaw ngan kamaglipayon han ngatanán. An halaba
