-Anó, tukib na kamó? Makakagtikang na kita?
-Itó ngahaw, bagá waray la kaalantad!- nagsiring in usa nga senyora nga balo.
-Ta, magkalingkod an mga senyoras ug senyores ngan manhunahuna han karuyag ipamakiana.
Hi Mr. Leeds linmagos ngadto hin usa nga pwerta ngan waray kaihá gumawás liwát may dará nga usá nga kahonkahon nga kahoy nga itóm, tuhuktuhók na, ngan may mga badlis ha lawas nga mga tamsi, kamanampan, mga bukád, ulo hin tawo ug iba pa.
-Mga senyoras ngan senyores,-nagsiríng hi Mr. Leeds hin inungod nga tingog; -han pagkadto ko nakausá han dako nga piramide ni Khufu, an paraón ha ika- upát nga dinastiya nakakitá ako hin pantiyón nga bantilis nga pulá didto hin usa nga suok nga hinbabaliwngan. Dinangóp ako hin dako nga kalipay kay an isip ko nga nakaagi ako hin usa nga momiya hin namatay nga hadianon nga tawo; kundi naghuwawa ako kay han kaukbi han pantiyon, katima hin maiha nga kabudlay, waray ko hinagián didto ha sakób kundi amo la ini nga kahonkahon nga mahihimo niyo hin pag-usisaha.
Ngan idinuhól an kahonkahon ngadá han siyahan nga rumbay han mga bangko. Hi P. Camorra inmisol han lawas daw nahugaw, hi P. Salvi dinmuok pagkita bagá nabibihag han mga butang ha lubnganan; hi P. Irene nalilipay ha hiyom nga may sinasabután; hi D. Custodio nagpapakahimuot nga nadiri, ngan hi Ben Zayb nalilisang pamiling hin espeho; may adá gud didá kay mga espeho an kinahanglan.
-Mamiruminatáy!- nagsiring in usa nga senyora; -puff!
Ngan magpinaypayon hin waray kaluoy.
-Namamarág hin kanán kap'atán na kasiglo!- nagsiring in usa hin makusóg nga tingog.
Hi Ben Zayb nahangalimót han espeho kay say inatubáng an panginano kun hino adto nga nagluwás hadto nga pulong. Asya in usa nga militár nga nakabasá han kaagi ni Napoleon. Hi Ben Zayb naawa, ngan basi makaluwás man hiya hin pulong nga makalisang kan P. Camorra, nagsiring:
-Namamarág hin singbahán!
-Ini nga kahonkahon, mga senyoras ug senyores,- nagpadayon an Amerikano,- may sulód nga uusá kahakóp nga agbon ngan hin pinit nga papiro nga sinuratán
