—Domestiques, amo an mag-anad na; waray ka abat nga may ada mga dagway bin mga tulisan? Amo ito an mga servantes.
—Matuod ito!—sinmumpay hi donya Victorina;—may ada magraot in batasan... hunahuna ko adto nga ha Europa ngatanan mga pormal ngan... lugaring kay nahananabo ha Francia... nasabot na ako!
—Sst! sst!
Kundi dida hini hi Juanito kapihawi han pagtikang han pamaligya; kabuksi han baral, an mga suruguon nga napiplitihan ibinubutang didto han hintutungdan nga pasabot. An mga suruguon, nanapulo ada kun nanapulo ba kagduha nga mga barasbasan, may mga uniporme ngan may mga sanga hin kahoy ha kamot, didto pamagkatukdaw ha tungod han pasabot nga domestiques.
—Amo ini an mga binalay!—nagsiring hi Juanito.
—Baga gad man gud in kagagabuti pa la han mga alin-alin,—nagmugo hi donya Victorina;—yana kitaon ta iton mga magkilas pa.
Sinmunod in usa kadosena nga kababayin’an, pinangunguluhan han malipayon nga Serpolette mag-upay an mga sul-ot, tagsa ha ira may hinugpong nga bukad ha hawak, magtawatawa, maghiyumhiyom daw mga bag-o nga kita, magpakaiipa, ha dako nga kaaluhi kan Juanito, tinmungod ngatanan didto han servantes.
—Ano na?—nagpakiana hin waray maraot nga tuyo hi Paulita;—amo ito an mga ihalas nga imo sinisiring?
—Diri,—binmaton hi Juanito hin waray kaalantad; —namagsayop... nagkabaralyo... Iton iito ha luyo nasunod.
—Iton namamagdaop nga may dara nga mga latigo?
Hi Juanito nasinyas han ulo hin pagtangdo, kundi lisang na ngan tarantado.
—Kun sugad, ito nga kababayin’an amo an mga cochers?
Hi Juanito tigda igin-inubo hin makalilisang nga nakaurit han iba nga mga magkirita.
—Pagawsa ito! Pagawsa iton itikahon!—ginmuliat in usa nga tingog.
Itikahon? Hiya, pagngangaranan hin itikahon ha atubangan ni Paulita. Karuyag hikit’an ni Juanito an halaba in dila kay iya pakikilal’on hin itikahon. Ngan tungod kay an kababayin’an nairog, dinmugang hin pangisog ngan
