nahuna hin pagpasagad han sakit ngan pagtubyan ha
kamatayon han iya hin-uutangan hin kaburut-on bisan
mag-agi hin maglipayon ngan binukadbukaran nga
dalan, kay mauruupay han pagpahalawig han iya kinabuhi ha lunlon igindidiri.
-Kalurong ko gad!-masukot hiya sumiríng;—an kadam'an lurong salit nagbabayad... Kundi napiling han ulo kun nahanunumdom kan Julí, han haluag nga kabubwason nga iya inaatubáng: naghuhunahuna hiyá hin pag-ukóy hin waray dum-it ha kasingkasing. Salit iginpapadayon an pagbulóng nga iya iginlagda, ngan unob nagbabantay.
Kundi an masakit ha adlaw-adlaw, bisan kun may haglipot nga kalungganayan, nagtitikaraót la. Hi Basilio, nga nagtatalinguha hin inanay pag-iban han apyan nga tinatabakó o bisan na man la diri pagpatakas pagtabakó hin gawás han hin-aaraan, danay niya hiabután, ha iya pag-uli tikang ha ospital o tikang ha panlaoy hin magsakit, nga hinmumuukan ha paghingaturóg agi han apyan, naglalalaway ngan iginduduruas bagá an minatáy. An batan'on waray gud sasabót kun diín la titikang an apyan nga ginta tabakó; an mga tawo la nga parakada hadto nga baláy amo hi Simoun ngan hi P. Irene; hi Simoun talagsa la tumungbaláy, ngan hi P. Irene unob nagsasagdon nga diri pagtagan an masakit han iya karuyag ngan diri mag-asá kun tinutulos han giyán, kay an kasuruk'an amo an pagbawi ha iya didá han sakit.
-Pagtuman han imo katungdanan, batan'on, nasiring, pagtuman han imo katungdanan.
Ngan dayon pagwawali hin madaliay mahatungód hini nga bagay, ha inungod ngan tukib nga kasindak nga hi Basilio inalpan hin karuyag han magwarali. Hi P. Irene nagsasaad pa liwat hin pagbilíng para ha iya hin maupay nga kolokasyon, usa nga maupay nga lalawigan, ngan ginpakita pa ngani hiyá hin kasayunan hin paghitungdi kapropesor. Hi Basilio, bisan kun diri napadara han mga inóp, nagpapatuod nga nagtutuman hiyá han aadá ha sakób han iya kasingkasing.
Hadto nga gab-i hamtang nagpapaguwá han Les Cloches de Corneville, hi Basilio nagtitinuon ha atuba- ngan hin usa nga daan nga lamisa, ha tungód hin usa nga lamparahan nga lana, nga an pantalya nga salaming nga malubóg an tuman la nga nahatag hin kapawa han iya masamdong nga nawong. May uusa nga daan na
