pagpahamutang han mga kurit, kundi diri nakakapugong
nga pagtipigan han nahagugugma nga batan’on hin kainawilan nga labaw pa hin usa nga sinurat ni Safo o ni Musa
Polyhymnia.
Ini nga iya tuyo pagpahiunong han gugma tungod han dungog, an kabubut’on hin pag-antos ha pagsugot han turumanon, waray pakaulang nga in usa nga dako nga kasamdong dumangop kan Isagani ngan makaaghat hin pagpinanumdom hadton magpakaruruyag nga panahon nga nag-agi han naggigipahuringhuring hira hin mga kabinuangan dida han mga rihas nga may mga mansitas ha entresuelo, kabinuangan nga para han batan’on may sulod nga inungod nga kamatuuran nga baga in amo la nga butang nga sadang tangduan bisan han gihataasi nga pagsabot han tawo. Hi Isagani nagpipinanumdom han ira mga pasyada, an mga gab-i nga bulanon, an feria An mga kaagahon ha Disyembre, katapos han misa de gallo, an tubig nga bendita nga iya idinuduhol ngan an pagkarawat, nga ginpapasalamatan ha iya hin usa nga siplat nga tugob hin siday han paghigugma, ngan ngaduha hira nakibig kun naghihisaping an ira mga tudlo. Dagko nga panhayhay daw gudti nga kuwitis nagpapan-gawas ha iya dughan ngan nadangop ha iya hunahuna an ngatanan nga balak, an ngatanan nga pulong han mga tigsiday ug mga manunurat mahatungod han kadiri unob han babayi. Iya ikinasisina ha sakob han iya kasingkasing an katukod han mga teatro, an opereta francesa, ngan nagsasaad hin pagbulos kan Pelaez ha siyahan nga higayon. An ngatanan nga nakada ha iya harani daw puro la masubo ngan magsirom; an dagat, mamingaw ngan wa ray tawo, labi na hin kamamingaw an pipira nga bapor nga nanhihiduong; an adlaw nga natutunod ha luyo han Mariveles, waray siday ngan waray angay, waray mga magpakaliliaw ngan tugob hin tina nag mga dampog kun palaran nga mga kulupay; an monumento ni Anda, nga waray hitsura, bastos ngan nagbubugiot, waray susgaranan, waray pagkatakos; baga la in sorbete, kun diri man hupya; an mga pagkatawo nga namamagpasyala ha Malecon, bisan kun may mga tindog nga kanan mga tamo ngan waray liniliot, baga mga budol, dagko in buot ngan hanginon; an kabataan nga namamag-urugyag ha baybayon magluya ngan waray mga batasan, namamagpakanap hin mga yapad nga bato ha bawbaw han mga balod, o nanmu-
