mamingaw an kasidsiran... Ah! kun hangangadto ka la
makausá, kun iton imo nga tiíl tumunob hadto nga mga
dalan, kun ikugáy mo an katapusán han imo mga tudlo han mga tubig han sapá, kun sumiplat ka han dagat,
kun lumingkod ka didto han bató ngan bantarón mo an
hangin han imo malanoy nga mga karantahon, an akon
kagurangan magigin-Paraiso, an mga balód han sapá
mananag-awit; mabislak in silaw didá han magsiróm nga
dahon, magigin-mga brilyante an mga turo han tun-og
ngan mga mutya an burá han dagat!
Kundi hi Paulita nakabatí nga basi umabot ngadto han bungto ni Isagani kinahanglan mag-agi hin kabukiran nga duro in limatok, ngan tungód hini nga hunahuna, an tal-agán ikinurog hin kahadlok. Hubya ngan inugayan nagsiring nga mapakadto hiya basta sakay hin kotse o ferrocarril.
Hi Isagani, nga nahangalimót han iya mga panhunahuna ngan say la kinikita, bisan diín in mga bukád nga waráy tunók, nabatón:
-Diri na maiha an ngatanán nga puró tataraon hin mga dalan nga puthaw:
Ngan an mga trenes
Magtuturupad
Magkakalupad,
Paraglanát
sugad han pulong hin usa; kun sugad, an ngatanán nga daplin hini nga mahusay nga kapurupud'an hingangadtuan han ngatanán.
-Oo, kundi sano? Niyán kun lagás na ako...
-Ah! Diri ka maaram han aton mabubuhat ha sakób hin pirá katuig,-binmatón hi Isagani;-diri ka maaram han kasindak ngan kusóg nga aadá hiní nga tuna nga mahamamangno kahagos hin pirá kasiglo nga paghingaturóg... An España naninimangno ha aton; an aton mga batan'on ha Madrid nagbabalhas adlaw gab-i ngan iginpapahanungod han tuna nga natawhan an ira hibaró ngatanán, an ira uras, ngatanán an ira pangahás; may mga magluluuyon nga tingog nga natampo didto han aton, may mga politikos nga nasabót nga waray na masugad kamadig-on nga butók han pagkausá han mga katigayunan ngan han mga pagbati; iginagawad ha aton an pagkamatadong ngan ngatanan nagpapahayag hin mapawa nga kabubwason!"....Matuod dinimalas kami yaná, kami an mga estudyantes, kundi an pagdarag'an nagtitidangán
