an tawo nga gutóm angay magdayig han mga prayles.
-Maupay, maupay!
-Oy, nagsiring hi Isagani hin inungod;-an siring ko ha imo nga kun mga prayles in say mo hinanabihan, may gintatahod ko nga uusá!
Hi Sandoval nga hubughubog na nagtikáng pag- kanta:
"Usa nga prayle, duhá nga prayle, tulo nga prayle dida ha koooodo, amo gud la gihapon an lara sugad hin usa nga toooodo!
-Pamati kamo, kabugtuan; panumdumá niyo adto nga maghusay nga mga adlaw han iyo pagkabata, usisana niyo inin iyo yaná panahon ngan pakiana kamo han kabubwason. Ano iyo kinikita? Prayles, prayles, ngan prayles! Usa nga prayle in nagbubunyag ha iyo, nagkokompuma, nalaoy na iyo eskwilahan hin mahigugmaon nga pag-amuma; prayle an namamati han imo siyahan nga mga sekreto, amo an siyahan nga nagpapakaon ha mo hin usa nga Dios, asya in nagtututao ha imo han siyahan nga pitad dida ha paglalaktan han kinabuhi; mga prayle an imo siyahan ug katapusan nga magturutao, prayle an nagbubukás han kasingkasing han imo hinigugma kay basi mahiandam hin pamati han imo mga panhayhay; usa nga prayle an nagkakasál ha iyo, asya an nag-aagda ha iyo papagsakaysakay ngadto han magkalainlain nga puró basi ha pagpalain hin panahon ngan paghawliaw; hiya an aada tambong han imo paghingutas ngan bisan ka sumaká ngadto ha bitayán, aadto an prayle nga maupód ha imo han iya mga pangadí ngan mga luha, ngan tapod na la nga diri ka manta babayaan ngadá han kamatay mo nga nagbibitatay. Kundi, an iya pagkaluoy diri tubtob la didá; kun patay ka na, magtatalinguha nga mahalubóng ka hin kanán may dungóg nga pagkatawo, manganganás nga an imo lawas iagi ha singbahán, nga mahatagan hin mga responso, ngan didá na papahuway nga hitutunghan kun mahabutang ka na niya ha mga kamót han Magburuhat, hinugasan na han ngatanán nga salá dinhi ha tuna, salamat han iginpaantos nga mga sirot, darahog ngan mga pagtamay. Tungód kay mga anád hirá han doktrina ni Cristo nga diri natugot pagpasaká ha langit han mga manggaran, daw mga bag-o nga magbarawi, totoo nga mga tinapuran han Manunubos, nagtutuha han ngatanán nga mga makalilipat nga paagi basi ka
