Aga pa kaupay nga bumuhát hi Basilio ngan mapakadto ha ospital. Daan na niya hinanay an iya bubuhaton: mabisita hiya han iya magsakit, katima mapakadto ha Unibersidad panginsayod han iya pakagraduwar ngan unina makikigkita kan Makaraig mahatungód kun pipirá an magagasto didá hiní ngatanán. Kadak'an han iya tinirok nga kuwarta iya nagamit ha paglukát kan Juli ngan hin pag-arog hin payág nga pauukyan ha iya ngan han iya apoy, kay waráy hiyá gahóm hin pagdangóp, tungód hiní, kan Kapitán Tiyago kay bangin makahunahuna nga diri iní bahín nga igin-uuná han iya surundanon nga iginsisinaád ha iya.
Bangá hiní nga mga panhunahuna waray hiya panginano han purupundok nga mga estudyantes nga aga pa nagkakagawas didá ha siyudad sugad hin nagsadá han mga klases; labí na nga waray sabót han mga dagway nga kanán may mga kagupong han pipirá ha ira, han mga higawhigaw nga hiruhimangraw, han mga patiriguhon nira nga pasirusinyas. Salit han pag-abót niya ha San Juan de Dios ngan pagpakianhi ha iya han iya kasangkayan mahatungod han pagribók, hi Basilio linmukso tipaisol kay nahanumdom han kan Simoun ginpapalakát nga nagkagá tungód han urusahon nga nahinabó kan Simoun. Tugób hin kahadlok ngan ha lubad nga tingog nagpakianá, nagpaka-diri maaram:
-Ah! an pagribók?
-Hinbaruán- nagsiring an ginpakianhan, -ngan damo in nanhihisakób. Hi Basilio nagpaka-waray kalisang. -Damo in nanhihiupód?- sinmubád ngan nagtalinguha hin pagsabót didá han mga paniplat han ibá; -ngan hirá hino man....
-Mga estudyantes, damo nga estudyantes!
Hi Basilio nakahunahuna hin diri na pagpakianá kay nahadlok bangin lugód hiyá hisabután, ngan pumasangil nga nabisita hiya han iya magsakit, pinmaharayó didá han pundok. Tinapó hiya hin usá nga catedratico ha clinica nga iya sangkay, dinun'an hiya hin paurusahon ha sugbong, pinakianhan hin gutiay nga tingog:
-Nahangadto ka han panihapon kagab-i?
Hi Basilio tungód hadto nga kalisang nga ha iya naguóp
