ngan masumatón nga tinapuran han mga propesores
han facultad.¹
An siyahan nga katedratiko binmatón han iya saiudo hin mahagkot ngan kinmiró kan Basilio, nagyakán hin dako nga tingog:
-Maaram ako nga hi Kapitán Tiyago makarukandilá na; an mga uwak ngan han mga buitre nagbisita ha iya.
Ngan sumulód didto ha ruwáng han mga propesor.
Warȧy na kulba, hi Basilio nahagaróy pamilíng hin ibá pa nga sumat. An iya la nasayuran nga pinanhiagián in mga paskin didá ha purtahan han Unibersidad nga ipinapanlanit han Vice-Rector kay igpapadará ngadto ha Gobierno Civil. Nasiríng nga adto nga mga paskin tugób hin mga pagdumót, pamatay, pagsulang ug ibá pa nga hurab.
Amo iní an ginhihiruhimangraw han mga estudyantes. Ini nga mga sumat tikang didto han parapanilhig, nga sinumatan la liwát hin usa nga suruguón ha Santo Tomás, ngan ini didto hibaró hin usa nga capista. Igintatagna nga damo in magkakahuhulóg, magkakabibilanggo ug ibá pa ngan tinutudlok an manhihiunong, kaiyá nga amo an mga api han Katig-uban.
Hi Basilio nahanumdom han mga pulong ni Simoun: Ha adlaw nga hisakban ka nira.... Diri ka makakatapos hiton imo carrera...
-May iya hinbabaruán?- nakapakiana ha iya ngahaw; -kitaon ta kun hino in labi nga may gahóm.
Ngan waray na pag-aláng kay basi lugód niya hisayuran hin tibway ngan layón an panginsayod mahatungód han iya paggraduwar, hi Basilio nagpadayon ngadto ha Unibersidad. Didto hiya pag-agi ha kalye. Legazpi ngan magsulsog han Beaterio ngan han pagabót niya ha likduan ngadto ha kalye Solana kinmita hiya nga totoo man gud nga may ada dako nga hinabó.
Waray mga purupundok nga mag-aringasa ug maglipayon sugad han kabatasanan, an nakadá ha mga bangketa amo in magpadispadís nga mga Guardia Veterana nga asya an nagbubuót han pagkalakat han mga estudyantes nga nagkakagawas didá ha Universidad, waray aringasa an ibá, magsubó ngan hangit an ibá, nanhihipahungát didto ha antaw o nagpapanguli ha ira mga baláy. An siyahan nga iya iginkita amo hi Sandoval. Kawang la an pagtinawaga ni Basilio; bagá
