Hi Basilio nga nawawad'an na han kakulba, nagsinumat kan Makaraig han iya tuyo panungbaláy. An
salapianon nga estudyante waray paghulát nga makatapos ngan linamano lugód.
—Tapod ha akon, tapod ha akon ngan ha pagsaurog ta han aton paggraduwar kukumbidahón ta ini nga mga senyores, nagsiríng tinudlok an kabo ngan han agwasil.
- Vox populi, vox Dei¹
Binayaan ta hi Isagani nga naglalaygay han iya kasangkayan. Ha butnga han iya kasindak dinaop hiya hin usa nga capista pagsiring nga hi P. Fernández, usa han mga catedraticos de ampliación, karuyag makig- himangraw ha iya.
Hi Isagani nahapaukoy. Hi P. Fernández, para ha iya, asya in usa katawo nga makatatahod kaupay; amo hiyá an uusá nga unob iginagawás niya kun uras hin pagpakaraot han mga prayle. aná.
-Ngan anó in karuyag ni P. Fernández?- nagpakiana.
An capista nagpakuró han sugbong; hi Isagani binmunyog, maraot an buót.
Hi P. Fernández, adto nga prayle nga aton hinkit'an didto ha Los Baños, naghihinulat didto han iya sulód, nahimuot ngan masubó, nagkukuriot bagá in nagpipinamurubuót. Binmuhát han pakakitá kan Isagani nga sinmulód; sinmaludo hiyá, idinuhól an kamót ngan magsadá han purtahan; katima maglinakatlakat patapustapos han iya sulód. Hi Isagani nagtitinukdawon nag- huhulát ha iya nga magyakán.
—Senyor Isagani, nagsiring han kaihá, an tingog bagá nakurog hin gutiay; —tikang ha akon tangbuanan hinbabatián ko ikaw nga nagyiyinakan; tungód kay itikahón ako, maupay inin akon pamatián, ngan nakahunahuna ako hin pakighimangraw ha imo. Say ko unob naruruyagan an mga batan'on nga nag-aasoy hin mahayag ngan may adá kalugaringon nga panhunahuna ngan pan-gawi; ha akon waray sapayán kun an ira huna-
