-Diri ira salá ngatanán, Padre, binmatón hi Isagani; an salá aadá han nagtutdo ha ira hin kaipokrita, aadá han naggagarong han panhunahuna nga diri pinugngan, han pamulong nga lugaringon. Dinhi an ngatanán nga panhunahuna nga tunay, an ngatanán nga pulong nga diri sinubád ha kaburut'on han makagagahom, ginngangaranan nga pilibustero, ngan ikaw sayod kun anó an kahulugán hito. Lurong an tungód la hin pakagluwás hin dako in tingog han iya nahuhunahunaan, nagpapasipara pag-antos hin mga pagdumót.
-Anó nga mga pagdumót in imo na gin-antos?- nagpakianá hi P. Fernandez ngan ginmangad han ulo; -waráy ta ikaw pabay'i nga mag-asoy ka han imo karuyag didá ha klase? Kundi, ikaw lain han ibá nga angay ko utdan hitó nga batasan, kun matuod ítón imo siring, basi masandag an lagdaan sugad han mahimo ngan paghirután an maraot nga susgaranan!
Hi Isagani nahapahiyóm.
-Nagpapasalamat ako ha imo ngan diri ako makikigbalingkot kun ibá ako o diri; kakarawton ko itón imo iginngangaran ha akon basi ka man kumarawat hitón akon ha imo igngangaran: ibá ka man liwát, ngan tungod kay diri kitá dinhi manhihinabi hin mga ibá nga tawo, ngan diri kitá magpapalutáw han tagsa naton nga pagkatawo, an bagá ha akon la iní, pinangangaro ko ha akon katedratiko nga lainon an turon han hiruhimangraw.
Hi P. Fernandez bisan kun naghuhupót han pagkaliberal nga panhunahuna, hinmangád han ulo ngan sinmiplat punó hin paghipausa kan Isagani. Adto nga batan'on uraura ngayan katiglugaring manhunahuna; bisan kun natawag ha iya hin katedratiko, ha sag-od nakikig-atubang hin katupong tungod kay nagpapasiparahin pagtugon. Bahin ha pagkamaupay nga diplomatiko, hi P. Fernandez diri la kay tinmangdo hadto nga kamutangan kundi kay hiya ngahaw an naghingayad.
-Maupay! nagsiring; -kundi ayaw ako pakasidnga nga imo katedratiko; ako usa mga prayle ngan ikaw usa nga estudyante, waray labis, waray kulang! ngan yaná napakiana ako ha imo, anó in karuyag ha amon han mga estudyantes nga pilipino?
Adto nga pakiana binmutbot hin tigda; hi Isagani waray pakatagám. Asya in usa nga bunó nga dinmukyas hin dalikyat hamtang in usá nananagáng, didá
