yayaknon kun an nagpapakaon ngan an gobyerno
magkasabot kay didá hiton 10 kun 12 ba nga sintabos
nga nakakarawat ha tagsa nga kriminal, lilimá nga
sintabos itón kanán usá?
Hi P. Fernández nagkikinagat han mga im-im.
-Magbug-at ito nga mga sumbong nagsiring, -ngan ikaw nalipas ka han aton ginkakasabutan.
-Diri, Padre; say ko gihapon hinmamangrawán an kwestyon han mga estudyante. An mga prayle, ngan diri ako nasiring nga kamó kay diri ko ikaw iginsusugad hitón aadá ha kadam'an, an mga prayle ha ngatanán nga mga ordenes amo hirá an nagin-magharatág hin kabuhian han sarabutan, ngan namamagyinakan ngan nagpapabantog hin waray panhikaaló, nga diri kami angay manhibaró kay mga sano mananagpasipara kami paglugaríng. Amo ito an diri karuyag nga an preso kumaon kay mamagmaupay ngan magawás ha bilangguan. An Kagawasan pag-ugaring kinahanglan han tawo, sugad han hibaró kakinahanglanon han sarabutan, ngan an pagdumiri han mga prayles nga kamí manhibaró asya an tinikangan han amon pagsupil!
-An hibaró ihinahatag la hadton angay habaró,- binmatón hin mamará nga tingog hi P. Fernández; -kun ihatag hin tawo nga waray karig-on ha buót ngan waráy kadarayawan, pagkarag la tugá.
-Kay anó nga may mga tawo nga waray karig-on ha buót ngan waray kadarayawan? An dominiko pinmakuró han sugbong.
-Mga kasurusnan nga nasususo ha gatas, nga nagiginhawa ha sakób han panimaláy.... kalibutan ko?
-Ah, diri, P. Fernández!-nakasiring an batan'on hin tigda; ikaw waray maruyag pagsantop han himangrawon, waray maruyag pagtamód han kahiladman kay nahadlok ka nga igkita ka didto han lambong han imo kabugtuan. Kun ano kami, iyo buhat. An bungto nga gin-uuripon ginpipirit hin kaipokrita; an gindidid'an han kamatuuran, ginbibinuwaan; an nanlulupig nanhihimo hin mga uripon. Waray kadarayawan, nasiring ka, oo! bisan kun an mga estadistika makakapangimbuwa ha imo nga dinhi diri binubuhat an dagko nga mga pagtalapas sugad han nahananabó didto hin damo nga mga nasod nga nagkakahuhubóg han pagpakamagsuruson han pamatasan han ibá. Kundi, bisan diri na kita mag-uliskay kun ano an nagiginmadig-on nga kaburut'on
