pag-ukóy hin waray aringasa, ano in paghupót ta hin
mga pagdumót ug mga pagtahap?
-Kun amo, pagpatag-usaá ta....
-Oo, kay kun tigdaón ta tikang ha puno maluluka inin kabug-usan nga baláy.
-Salit daginutá ta, bayai ta anay an mga kamatuuran ha panhunahuna, nagsiring hi Isagani nga nahapapahiyóm; -ngan hin diri man liwát ako magsusumát han lugaringon ko nga panhunahuna- ini ipinaabat gud kaupay nga mga pulong han batan'on, —an mga estudyantes magbabalhin han ira mga turon ngan mag- mamasarusayón in mga kakurian kun an mga propesores mahabaró hin pagdará ha ira hin mauruupáy han ira ngadá yaná pagdará... iní aadá ha iyo mga kamót...
-Kay ano?- nagpakianá an dominiko; -may adá han mga magturuon dinidirian pa han akon binubuhat?
-Padre, nagsabot kitá, ha pagtikáng, hin diri paghinabi ha imo sugad man ha akon. Hinnanabihan ta an kasahirán: an mga estudyantes, labot la han waray nira nakukuha nga himurulsan ha sakób han mga tuig nga ibinubutho ha klase, danay didto manhibilin in napiksi nga bahín han ira dungóg, kun diri lugaring usahay an bug-os nga dungóg.
Hi P. Fernández kinmagát han mga im-im.
-Waray ha ira nagpipirit han panag-arám; muon an mga tuna waray nagtatanóm,- nagsiring hin mamará nga tingog.
-Oo, may adá nagpipirit ha ira papag-arám,- binmatón hi Isagani hin sugad man nga tingog ngan binuslong ha atubangan an dominiko. -Labot la han kaudganan han tagsatagsa hin pagbiling han iya pagkahingpit, aadto pa an talinguha nga dará han paghinugso han tawo hin pag-hupót han iya sarabutan, talinguha nga labí dinhi kamakusóg tungod kay labí nga ginpupugngan; ngan an natubyan han iya bulawan ngan han iya kinabuhi han Estado, may katadungan hin pangaro han Estado hin kapawa basi magmakurukusóg magbiling hin bulawan ngan magmadirudig-on hin pagmangno han iya kinabuhi. Oo, Padre, may adá nagpipirit ha ira, ngan itó nga nagpipirit amo an gobyerno, amo kamó ngahaw nga nakakatamáy hin waray paid han indiyo nga waray hibaró, ngan diri niyo tinatagan han iya mga katadungan, an iyo pulong tungod kay ignorante. Iyo ginhuhubuan ngan iyo gintitiawan an iya mga kaarawdan!
