taan bin sable ha kamot, sinmulod han singbahan, ngan kun waray hisagapot dida hin usa nga biray nga nabibitad tikang didto ha igbaw han kudo, waray bata nga sinasalinan hin ulo didto ha sakob. Tikang adto hikit’an han mga hadlukon ngan magdadlagan namagginugliat nga an rebulusyon inmabot na, usa la kadalikyat in nahagos. Namaghinagaklob an sada han mga purtahan han mga tindahan nga mga bukas pa, may kainsikan nga nagpakabaya ha gawas hin mga pieza hin panapton ngan diri kay pipira la an kababayin’an nga nag pakabayd hin mga sinilas ha kalsada kay nanhilabog han pagdadlagan. Salamat na la kay usa la in samad ngan hin may pira nga namay-panhupong, tampo hini amo adto nga militar han katumba tungod han pakigdinulong han biray nga iya hinsagaputan, kay namamarag nga daw kapa hin pilibustero. Adto nga iya kalalaki nakahatag ha iya hin maupay nga ngaran, ngaran pa ba nga hamili kay, hinaot pa unta nga an ngatanan, nga mga kabantugan masangpot hin sugad la hini nga mga pagpahaunong kay diri na mauuraura hin pamagtinangis an mga iroy, ngan magdadarudamo an tawo ha tuna!
Didto hin usa nga arrabal hinkit’an han mga magaramyaw in duduha katawo nga naglulubong hin mga armas ha sirong hin usa nga tabla. Nag-aringasa an baryo; karuyag han mga umurukoy didto nga paglanaton adto nga diri pinanngingilala nga mga tawo basi pamatayon ngan ihatag ha mga punuan, kundi usa nga didtuanon an nakapamingaw kay nagsiring nga igo na kun igpakita ha hukmanan an lawas han sala. Ha luyo nga bahin, mga daan man ngani nga eskopeta nga waray ruhaduha makakasamad han siyahan nga gumamit.
—Ada, hala!— nasiring in usa nga maisog; —kun karuyag nga magribdk kita, hala! Kundi an maisog ginbunalan ngan ginsuntok, ginpangungutol pa han kababayin’an baga sugad hin amo an tag-iya han mga eskopeta.
Didto ha Ermita darudako an hinabo, matuod waray pakaaringasa, bisan kun na may purugsilay. Usa nga empleado nga hingandam ngan waray pakikigbulag han iya mga armas, han pagkakulop nakakita hin lambong ha luyo han iya balay, pinakasiring nga usa nga estudyante ngan pinabuthan nakaduha han iya rebolber. An lambong kanan usa ngayan nga guardia han
