Didto han plateriya nga inuukyan ni Placido Penitente, ginhihiruhimangraw man gihapon an mga hinabo ngan namamaglantugi hin waray kahadlukan.
—Diri ako natuod hin mga paskin!— nasiring in usa nga obrero nga magasa ngan mamara tungod han duro na nga paghinuyop han tayhop; —para ha akon, buhat ito ni P. Salvi!
—Ehem, ehem!— nag-inigham an maestro platero, tawo nga mahirot nga, tungod han kahadlok nga pakasidngon hiya nga matalaw, diri nagpapasipara pag-utod han karukayakan. An buutan nga tawo nag-iilob na la paginigham, nakiro ha iya kalungon hin buhat ngan nasiplat ha kalsada sugad hin karuyag sidngon: —Bangin may nag-iininaw ha aton!
—Tungod han hinabo didto ha opereta!— nagpadayon an obrero.
—Aha!— nagsiring in usd nga sumatan an kahimo;—nasiring pa gud ako! Salit....
—Hu!— binmaton in usa nga eskribyente hin kanan maluluy’on nga tingog; —mahatungod han mga paskin matuod adto, Chichoy, kundi akon ka pagsasayuran!
Ngan nagyakan hin tingog nga paurusahon:
—Kan insik Quiroga adto palakat! —Ehem, ehem!— binmalik pag-inigham an maestro, binalhin an iya gupa ngadto ha luyo nga limugmugan.
—Pagmatuod la ha akon, Chichoy, hi insik Quiroga! Hinbati-an ko ha opisina!
—Naku! seguro pues!— nagsiring an sumatan nga daan nagmamatuod.
—Hi Quiroga,— nagpadayon an eskribyente, —may usa kagatos kayukot kapisos nga meks nga aada ha sakayan ha dagat. Uunanhon hito in pagpasulod? Ada, masayon; naghimohimo nga may mga paskin, pagpahimulos han aringasa han mga estudyantes ngan hamtang an ngatanan nasasamok, pung! hinuhukipan an mga empleados ngan pinasusulod an mga kahon!
—Amo, amo na!— nagyakan an sumatan nga pinmukpok ha lamisa. —Asya! Ugaay daw hi insik Quiroga. .. asya na!
Ngan inmukoy kay waray na hibabaro pagyakan mahatungod kan insik Quiroga.
—Ngan hi kita an manhihiunong?... —nagpakiana hi Chichoy, nauurit.
—Ehem, ehem, ehhem!— nag-inigham an platero
