cuerpo de caballeria nga tinmambong kay andam pagpugóng
han mga tag-iya kun panaglit umato: damo an
namagtangis ngan duro an mga ngurutob, kundi waráy
na-lahós didá hitó. An mga osyoso, usa ha ira hi Simoun,
nagpakadto pagkita han nagkawawarayán baláy, namagparupasyada
hin waráy la kaalantad ngan namagpakasiring
nga tikang yaná makakahimo na hirá hin himyang
nga pagkaturog.
Han naikatarapós an Abril, han hinngangalimtan na ngatanán an mga kaharadlukan, say nalilibangán ha Manila in uusá la nga hinabó: Amo an panagtawo nga ighahatag ni don Timoteo Pelaez tungód han pagkasál han iya anák, nga, bahín ha kamaupay ug kamakiaangayon, an Heneral nagtangdo hin pagka-padrino. Sinisiring nga hi Simoun an nagtalinguha hiní. An pagkasál bubuhaton mga duhá kaadlaw anay ugsa gumikán an Heneral, kay magpapasidungóg pagtambong han panagtawo ngan mahatag hin regalo han novio. Gin-guguruguro nga an alahero magpapaawas hin sulóg hin mga brilyantes, magsasaburak hin tig-usa kaharóp nga perlas ha pagpahalipay han anák han iya bakas ngan, tungod kay diri niya mahimo in paghatag hin lugaringon nga panagtawo kay waray niya baláy, ngan labot pa waray niya asawa, magpapahumulos hini nga panahón pagpakita han bungto ha Pilipinas hin usá nga kinasingkasing nga panamilit. An bug-os nga Manila nag-iinandam nga kumbidahón: waráy kakano pa man mahanabó an kulba nga dako ha tagsa nga kasingkasing tungód han kahadlok nga bangin diri kumbidahón. Nag-aaragaw hin pakisangkay kan Simoun ngan kadam'an han kalalakin'an, kay ginpipirit han ira mga asawa, nanmalít hin mga puthaw ug mga pligo hin sim basi la igkasangkay kan don Timoteo Pelaez.
