labi pa hin kamaraot hi imo ngan ha akon, iya ginbutangán
hin maraot.... Nakita ka hitó nga pawa nga
mabuság, nga bagá kanán elektrisidad, nga natikang
didto ha azotea? Amo ito an sugá han kamatayon!
May adá didá usa nga kingke nga ginbutangán hin dinamita,
nga aadá hitón pangaraunan nga punó hin polborá....
kun magbutó waray mabubuhi bisan usá nga
yatót, taná!
-Diri ako!- binmatón hi Isagani pinmiling hin masubó han ulo; -hahani la ako kay karuyag ko hikit'an hin amo na la.... buwás lain na hiyá!
-Matuman an kapalaran!- nagsiríng hi Basilio ngan linmakát hin madagmit.
Hi Isagani nakakitá nga an iya sangkay pinmaharayó hin kadagmitan pagpakita nga dako an iya kahadlok ngan nagpadayon pagkinita han mabihagon nga tangbuan, sugad han kabalyero ha Toggenburg nga naghihinulat nga manangbo an iya higugmaon, nga iginsusumat ni Schiller. Hadto nga uras an ruwáng waray na tawo; an ngatanán namagpasingadto han mga pangaraunán. Nakahunahuna hi Isagani nga an mga kahadlok ni Basilio tingali may kamatuuran. Nahanumdom nga an kahimo ni Basilio may dará nga dako nga kalisang, hiyá nga diri naaalantad hin dalidali, nagtikáng hin panhunahuna. Usa nga butáng sinmantop ha iya hunahuna hin mahayag; an baláy ilulupád nga hi Paulita aadto, hi Paulita mamamatay ha makalilisang nga kamatayon...
Tungód hini nga panhunahuna hinngalimtan niya ngatanán: an pangabugho, an mga gin-antos, mga kasakit ha kasingkasing; say na la hinnumdumán han maluluuyon nga batan'on an iya paghigugma. Waray na panhunahuna hin kalugaringon, waray pag-uruon, napasingadto hadto nga baláy ngan salamat han iya maupay nga trahe ngan han iya pamahongpahong nga waray pagaláng, nakasulód ha purtahan.
Hamtang ini nahananabó didto ha kalsada, didto ha komedor han kadidivusán nga dagko naglalakát ha mga kamot, paduhalduhol, in uusá kapinít nga pergamino diín nahasusurát hin tinta nga pulá inín makaharadlok nga mga pulong:
Mane Thecel Phares
Juan Crisóstomo Ibarra
