-An mga brilyantes?-nagpakianá hi Ben Zayb.
-Kun panhiagián...
Ngan bumalik pagmimika han mga tudlo han too nga kamót, pinapapanmirik tikang ha atubangan tipatalikurán ngan tikang ha gawás tipasakob, hin kiwá hin abaniko nga kinikidyom, daw may hinihiram ngan hinaharóp, daw mga pakó hin molino nga nagsisiphid tipasakob hin mga butang nga tinuha ha hunahuna, hin masalihit nga kasingkamot. Hi Ben Zayb binmaton hin iya man kiwá, pinukrat hin dagko an mga matá, pinapanmawod an mga kiray ngan humigop hin hangin sugad hin an hangin nga nakakabusóg hinbabaruán na han kinaadman.
-Jhs!!!!
- "Todo se sabe."1
Katima han damo nga binuhat bahín ha paghirót nga magsaráng an sumat, hinbaruán gihapon han kadam'an bisan kun ibá na an dagway ngan binalitwad. Amo na an himangrawon han pagkasunód nga gab-i didto han maduruto nga arrabál ha Sta. Cruz. An damo nga kasangkayan nira waray ibá nga himangrawon. Waray may naguuyág han tressyetes, waráy may nagtutuktok han piyano, ngan an gutiay pa nga Tinay, an putó han mga daraga, nauuyám na han pagsinungka nga uusá la hiyá waray gud pakakasantop kay anó nga say naruruyagan han mga tawo an mga panikas, mga paggubót, mga sinako nga pulburá, muon damo an maghusay nga buskay, didto han pipitó nga luhób nga haros namamagkininhaton ngan nanhihiyom han ira gudtiay nga baba nga nangangá basi mahasáka ngadto han "iróy"; hi Isagani nga kun napakadá, nakikigsungka ngan napapaglinimbong la ha iya, waray gud pakikigkabali han iya pagtinawag. Hi Isagani aringit ngan waray aringasa nagpipinamati han iginsisinumat ni Chichoy, an platero. Hi Momoy, an nobyo ni Sensia, an suhág han mga Orenda, mahusay ngan makurimot nga batan'on, bisan kun dapit maintrimis, inmiwas didto han bintana nga ira hurungkuan kinagab-i paghimangraw hin
