-Ah! Adto tungod kay mga kaaway ngan naato, hamtang ini... iní mga paysano ta! Ngan dumuok ha talinga han Carolino.
-Kalurong mo! Sinusugád hito pagdará basi sumari pag-ato o pagpalagiw, ta amo na.... pung!
Hi Carolino waray batón.
Usa han mga dinakop nagsarit pagpahuway kay may iya kabilinggan ha lawas.
-Makaharadlok iní dinhi nga lugar!— nagbatón an kabo nga sinmiplat, may kabaraka, ngadto ha bukid:
-Sulong!
-Sulong!- sinubád ni Mautang.
Ngan nagpanlapirit an sangá. An dinakóp naglubag ngan naniplat hin kasina:
-Lupig pa nimo hin kabangis bisan an katsila! nagsiríng.
Hi Mautang binmaton hin mga lapdos liwát.
Hadto ngahaw hinmuni in usa nga bala nga sinundan hin butó: hi Mautang binmuhi han pusil, binmuyayaw, idinuón an duhá nga kamót ha dughan ngan mapuklid katapos paglimbutáy. Ginkinita han dinakóp nga napulilid ha tuna ngan nagsuká hin dugó.
-Alto!- ginmuliat an kabo nga gilayón iginduruas. An mga sundalo nangukóy ngan naniplat paluyuluyó. May manipis nga usbok hin asó tikang didto hin kabagwakan ha igbaw. Hinmuni in usa pa nga bala, binati in butó ngan an kabo, nga naigó ha paa, kinmaób nagbibinuyayaw. An ira pundok pinangangawayan hin mga tawo nga napasalipód didto han kabagtuán ha igbaw. An kabo punó hin kapungót, tinmudlok ngadto han hinigtan nga mga dinakóp ngan magsiring:
-Puygo!
An mga dinakóp nagkaluhod, tugób hin mga kahadlok. Kay diri man nagpapakabikyaw han ira mga kamót, nangangaro hin kaluoy nanhaharok ha tuna idinudupo an ulo ha tuna: may nahamamangraw han iya mga anák, may adá kan iya ináy nga mawawarayan hin sadáng sarigan; may usá nga nagsasaad hin salapí, may nangangaraba sa Dios, kundi an mga kanyon nanhihipunta na tipaubos ngan an makalilisang nga butubutó nakatapos han ira mga pakimaluoy.
Ngan magtikáng an paburot nga butó ngadto han mga kaaway didto ha igbaw, nga hadto ngahaw naputós
