han guliat han tawo nga nahulog tungód han iya bala.
An siyahan nga nakasampong nakaabót hin usa nga lagás
nga naghihingutás, nahuhuyáng didá ha bawbaw han bató;
pinaysukán niya dayon han bayoneta ha lawas, kundi an
lagás waray gud pumirók: ngadto an mga matá pagkikinita han Carolino, usa nga paniplat nga diri matukib ngan
may gintitinudlok han tulanon nga kamót didto ha luyó
han mga bató.
An mga sundalo nanlingi ngan kinikita nga an Caro- lino iginpupurud-as hin makaharadlok, nahapapangangá ngan didá han paniplat daw inaabat an katapusan nga idlap han utok nga may buót. An Carolino, nga diri lain kundi hi Tano, an anak ni Ginhaupan Tales, nga pag-uuli pa la tikang ha Carolinas, kinmilala kan iya apóy, hi Tandang Selo, didá han tawo nga himaratyon, nga tungód kay diri nakakayakán, nagsisinumat an naghihingutás nga mga matá hin usá nga halawig nga siday hin kasakitan. Ngan, bisan kun patay na, nagtitinudlok pa ngadto ha luyó han mga bató.
Didto han iya puy-aw nga urukyan ha ligid han dagat, nga kinikita an kuyakuya dida han mga bukás nga tangbuanan, nga nabibitad ngadto ha hirayo ngan didto iginkakatukma han kasidsiran nga nagdadaparap, hi P. Florentino nagliliáw han iya pag-usaan ha pagtinuktok han armunyon hin mga sunata nga magpakamimingaw ug maglanoy, nga dinuduyugan han ngurob han mga balód ngan han hagiwis han mga sangá han kakahuyan didá han sapít nga kagurangan. Nagpapan-gawás didá han daan nga turunggon in mga tunog nga haglaba, bug-os, masamdong bagá an pangaraba, kundi tunóg nga linalakí; hi P. Florentino nga usa nga hingpit nga musiko, nagtula maiha nga nalakát pangalagiw han iya asawa nga nagnasasagdan ang mga kasubó han iya kasingkasing.
Matuod gud man, an tigurang mabiduon. An iya hinasá nga sangkay, hi don Tiburcio de Espadaña, diri pa la maiha nga nalakát pangalagiw han iya asawa nga nagbibiniling ha iya. Hadto nga aga kinmarawat hiya hin usa nga halipot nga surát tikang didto han tenyente han Guardia Civil nga nasiring:
