maturog hin bisan la diin ngan bumuhat kun hamangno hin bisan la maunano?
Ngan an apoy nagtitinangis, nagyiyinakan hin paghikog, hin pagpakamatay hin gutom.
—Kun mapakadto na,—nasiring,—mabalik ako ngadto ha kagurangan ngan diri na ako maulpot hin sawang.
Ginliliaw hiya ni Juli hin pagkasiring nga hi iya tatay kinahanglan umuli, nga an kalipungan magdadaog ngan ha gilayon malulukat hiya didto ha pagkauripon.
Naginmasamdong adto nga gab-i; waray han duha may nakakaon ngan an tigurang waray gud kapirit hin paghigda, nag-inagma han bug-os nga gab-i nagliliningkod didto ha piliw, mahilom la, waray yakanyakan, waray kiwakiwa. Hi Juli man karuyag kumaturog, kundi naiha hin duro waray hingapiyong. Dapit natapod na hiya hin gutiay mahatungod kan iya tatay, hi Juli nagpipinamurubuot mahatungod han iya lugaringon nga kamutangan ngan nagtitinangis hin waray hingan, kundi hinihilom niya an iya mga bikho nga diri hibatian han lagas. Han pagkabuwas han aga uripon na hiya, ngan amo pa ba adto nga adlaw an iinaabot ni Basilio tikang ha Manila may dara nga talagudti nga regalo para ha iya... Tikang yana waray na ha iya adto nga gugma, hi Basilio diri maiha magiginmediko diri na angay pumakasal hin usa nga kablas... Iya na haros kinikita yana nga tikadto ha singbahan kaupod han gimahusayi ngan gimanggarani nga daraga dida ha bungto, mag-upay an mga sul-ot, maglipayon ngan maghiyomhiyom ngaduha, hamtang hiya, hi Juli, aada nagsisinunod ha luyo han iya agaron, paradara hin mga nobena, mam’on ngan han luraan. Ngan dinhi an daraga nabati hin kamahibol ha but-ol, usa nga gumos han iya kasingkasing ngan nangangamaya hiya han Virgen nga tugutan hiya nga mamatay.
—Bisan na la,—nasiring an iya kasingkasing,— hababaro hiya nga ginmapil ako pagpauripon diri ko la igprenda an relikaryo nga iya hatag.
Ini nga panhunahuna nakakahatag ha iya hin gutiay nga kalipay ngan nakakapaghimuhimo hin mga paglaom. Bangin gad la! Kaduwas hanabo in usa nga milagro: nga hiagian niya in duha kagatos kalim’an kapisos dida ha mga tiilan han Virgen; damo na in nabasa niya nga masugadsugad nga milagro! An adlaw kaduwas diri na
