bituon nga linibutan bin malidong nga balaraw ngan may haglaba nga ikog nga kun igin-aaruabyog ha hangin namamay-matam-is paniiran nga tunog ngan hin mga isda nga nagkikiwa an ulo ngan ikog ngan sinugaan hin baso nga may lana didto ha sakob, ngan pinanmimitay dida han mga pirok han atop, ha tungod han tangbuan, nga nakakahatag hin makawiwili nga dagway han malipayon nga piyesta nga kabatasanan. Inaabat man liwat ni Basilio nga an mga paglawag ha kalsada nagtitikaiban; nga an mga bituon nagkakawawara ngan hadto nga tuig kurukulang hin mga sabong ngan mga kolgadura sugad han inmagi nga tuig, ngan ini nga inmagi kurukulang liwat han nahauna. Sakuri nga may musika ha mga kalsada, an magpakalilipay nga aringasa ha kusina waray hibabatii ha ngatanan nga balay, ngan hinulog han batan’on nga tungod ada han maiha na nga pagkuri ha bisan ano, an asukar diri napapalit hin maupay, an kataon han humay diri himurulsan, kapin hin katunga han mga hayop nagkamatay ngan an mga kabubhisan nagsisinaka ngan nagdidinugang, waray sasabuta kun tiunano ngan kun kay an6, hamtang ha luyo nga bahin masukot an panraugdaog han mga guwardiya sibil nga amo an napatay han kalipayan han mga bungto.
Amo gud ini an iya ginpipinanhunahuna nga bation in maaningal nga “alto!” ha mga talinga. Naagi gud hira ha atubangan han kuwartel ngan usa han mga guwardiya nakakita han waray suga nga parol han kalesa, ngan adto diri mahihimo nga magpadayon. Nagtikang dayon in paburot nga mga panampalas patok han makaluluoy nga kotsero nga kawang la an pamaribad han kahilaba han prosesyon, ngan tungod kay pipirisuhon dara han pagtalapas han mga bandilyo, ngan unina ibubutang ha mga pahayagan, an buutan ngan mapinaubsanon nga Basilio linmusad dida han kalesa ngan magpadayon han lakat, nakakapas-an han iya maleta.
Amo adto an San Diego, an bungto nga waray niya bisan usa nga urupod.
An balay ni Kapitan Basilio amo la in baga malipayon. Kamanukdn ngan kapisuan mangiyagak ha kamatayon upod hin mga tinaguktok daw nagtatadtad hin karne, ngan han risidisi han mantika nga nakaladkad ha
