Mga pira kadali tikang hadto, dida hin usa han mga dalan han bungto, nabati in mga tingog ngan nag-aningal in duha nga buto; kundi waray la hadto may nabaraka, ngan katima bumalik liwat an kamamingaw.
Masirom an gab-i; nangangaturog hin tuok an mga mag-aramyaw; an mga bumabalay nga nanhinumdom han ira mga minatay murayaw ngan mamingaw an panhingaturog hadto nga gab-i; nagpakapangadi hira hin tulo kabahin han rosaryo nga may requiem, an nobena han mga kalag ngan nagpakaupos hin damo nga kandila nga taro ha tungod han mga birilhon nga ladawan. An mga manggaran ug mga salapian nagpakatuman man han mga turumanon nira hadton ira pinanundan han ira mga manggad; buwas maniningba hira, pamati han tinagtulo nga misa nga pagmimisahon han tagsa nga padi, manmamayad pa hira hin tigduha kapisos nga limos hin usa pa nga misa nga ira ungaraon ngan manlilimos pa hin bula han mga minatay (1) nga damo in dara nga indulhensiyas. Diri kaupay dako an ungarad'on han Pagkamatadong nga Diyosnon; diri sugad han tunan'on.
Kundi an kablas, an waray katigayunan, nga sakuri nakakaagi hin ikinabubuhi ngan kinahanglan pa sumuhol han mga punupuno, han mga manunurat ug han mga sun. dalo basi diri paglabtan an iya kaukoy, diri nahangangaturog hin mamingaw, han kamamingaw nga siridayon han mga parasiday nga tingali waray panag-agi hin kakablasan. An kablas mabido ngan namumurubuot. Hadto nga gab-i bisan la gutiay an pinangadi, nangamuyo hin dako, dara in kasakit ha mga mata ug in mga luha ha kasingkasing. Waray niya mga nobena, diri maaram han mga pangadion. nga linatin, han mga gozos ug mga oremus nga pinanhimo han mga prayle, ataga hadton mga waray kalugaringon nga panhunahuna ug kalugaringon nga pagbati ngan diri man liwat nananabot han ira ginyiyinawyaw. Ipinangangadi an yinaknan han ira pagkamakaluluoy; an ira kalag nagtatangis tungod ha ira ngahaw ug tungod han ira nagkamamatay nga mga urupod nga nahagugma ha ira ug say ha ira nakakalipay. An ira mga im-im nagpapakaluwas hin
