pagminama; an kababayin ’an nanhihipahangad ha iya, kundi
an lalaki nga naglilinakatlakat sinmagbang, dapit nahakakayubit:
—Ta, ako, hini la nga tuig labaw hin upat nga plenarya han imo in akon nakarawat, Hermana Rufa, ngan labaw pa hin usa kagatos katuig, ito ngani nga hini nga tuig waray gud ako pagpinangadi hin uraura.
—Labaw pa ha akon? Labaw pa hin 157 nga plenarya, nga ma-764,598 katuig? — nakapakiana hi Hermana Rufa, dapit nauurit.
—Oo, amo na; labaw pa hin walo nga plenarya ngan labaw pa hin usa kagatos napulo kaglima katuig ha sulod la hin pira kabulan, — binmaton an lalaki nga may nanhihisal-ong ha liog nga mga kuwintas ug mga eskapularyo nga duro na an buring.
—Angay man, — nakasiring hi Hermana Rufa nga pinmalupig na la; — salit magturutdo ka ngan puno ha lalawigan!
An lalaki nahapahiyom, dinmako an buot.
—Diri gad man-gud urusahon nga lupigan ta ikaw, kay makakasiring pa ngani ako nga bisan ako nakaturog nakakasalod ako hin mga indulhensyas.
—Ngan ikinakain mo man ito ngatanan, maestro?— nagsarabat pagpakiana in mga upat kun lima ba nga tingog.
—Psh! — binmaton an lalaki, nanyayam-id, dako an pakayubit; — akon la ito iginkakawalat bisan ngain!
—Ito ngahaw an diri ko ha imo idadayaw, maestro! — sinmupak hi Rufa. —Hangagadto ka ha Purgatoryo kay ginkakaragan mo an mga indulhensyas! Sayod ka nga ha ikinausa kapulong nga waray gamit gin-aantos in kakap’atan kaadlaw nga kalayo, nasiring an padi; ikinausa kadangaw nga inulang, kakaunman; ikinausa katuro nga tubig, kakaruhaan. Hangangadto ka ha Purgatoryo!
—Hababaro na ako pagguwa didto!—binmaton hi Hermano Pedro, dako an pagtapod, —Damo na nga kalag akon ginkuha ha kalayo! Damo na akon pinapagsantos! Labot pa, kun mag-articulo mortis na ako makakakarawat pa ako. kun karuyag ko, bisan la pito nga plenarya, ngan matatalwas ko pa in iba, bisan ako maghihingutas na!
Katapos hini pamulong pumaharayo, dako kaupay an buot.
—Bisan la, angay ka magsugad ha akon nga diri ko ginkakaragan an tig-usa kaadlaw, ngan tuhay iton pagdara
