himurulsan han kalo bin obispo diri manta nira uuyunan. Ta, kun lupigan na kamo, igpahayag na ngahaw niyo an iyo na karuyag nga totoo ngan maupay say magluwas in usa la nga ubos niyo nga tampo, kay uuyunan manta didto ha luyo kay dapit nira pagpahaubos ha iyo.” Kundi ayaw kamo hini pagsumat.
—Kundi . . .
—Asya na man ngani, igpapahayag ko an panhunahuna han aton mga kaaway, akon padadakuon nga uraura tubtob nga mapataraw’an .... Saba! Aadi hira Sr. Ibarra ngan han magturutdo ha liburan.
An duha nga batan’on namaghatag hin katalahuran han namamaghurungko, kundi waray tampo han ira hiruhimangraw.
Ha mga pira kadali sinmulod an gobernadorsilyo nga nagkukuriot: asya hiya an tawo nga aton nakita kakulop nga nagdadara hin uusa kaarroba nga kandila. Pag-abot la niya umukoy an mga hiruhimangraw, an tagsatagsa naghinlingkod ngan waray kaiha magmingaw.
Linmingkod an Kapitan(5) didto han dako nga lingkuran ha tungod han retrato han hadi, inmubo nakaupat, kun nakalima ba, ibinapyod an kamot ha ulo ngan ha bayhon, nangalinduon han siko dida ha bawbaw han lamisa ngan kuhaon liwat, binmalik pag-ubo ngan balikon liwat an iba pa nga kilos.
—Mga ginoo! — nagsiring katima, an tuman la nga nakakatingol; — nagpakatakos ako pagtirok ha iyo yana . . . ehem, ehem! . . . . nagsasaurog kita han kaadlawan han aton patron S. Diego ha ika-12 hini nga bulan .... ehem, ehem! yana nga adlaw ikaduha.... ehem, ehem!
Pag-abot nganhi ig-inubo hin mahinay ngan mamara ngan waray na pakayakan.
Dida hini binmuhat didto han mga lingkuran han kalagasan in usa nga tawo nga may kakap’atan na an panuigon ngan kanan diri maabot an kahitaas han pamahungpahong. Asya hiya an manggaran nga Kapitan Basilio, kasibang ni adton D. Rafael, usa katawo nga nasiring nga tikang mamatay hi Sto. Tomas de Aquino an kalibutan waray na umuswag, ngan tikang hiya gumawas ha S. Juan de Letran(6) an Kalibutan nagtipaisol.
—Tuguti ako niyo, talahuron nga kaginuuhan, nga mamulong mahatungod hin usa nga bahin nga kasuruk’an, — nagsiring. —Ako an siyahan nga mamumulong, bisan
