— Nalipay? Hira, hira an nalipay! — binmaton an batan'on.
— Sumati daw ako kun nag-ano ka man han bug-os nga adlaw; kun hibatian ko dida ha imo mga im-im malilipay ako sugad hin nahitambong ha iyo. — Ada... nakadto . . . nagtibaw... nagkaranta... ngan namagkalipay! binmaton nahamamalanga.
Hi Salome waray na pakakailob, gintutok hin pakiana han iya mga mata ngan sidngon:
— Elias, masubo ka man!
— Masubo?
— Maaram na ako! nagsiring an daraga. —Iton imo kinabuhi masubo... Nahadlok ka nga hiagian ka? Inabat dida han mga im-im han batan'on in masugadsugad hin hiyom.
— May ada mo inuungara?
— Diri ba magsangkay kita? Diri ba magkasi kita kablas? binmaton hi Elias.
— Ano man nga masubo ka?
— Nakadamo mo na ako sidnga, Salome, nga matinungkuon ako.
Hi Salome tinmungok han ulo ngan nagpadayon pagtinahi, unina binmalik pagpakiana hin tingog nga iya gintalinguha nga makanan-waray la labot.
— Damo kamo?
— Damo hira!
— Damo an kababayin'an?
— Damo...
— Hira hino an kadaragan'an... an maghusay?
— Diri ko kilala ngatanan... may ada usa, an konsuelo han salapian nga inmabot tikang ha Europa, — binmaton hi Elias hin tingog nga an tuman la nga hinbabatian.
— A! an anak han manggaran nga Kapitan Tiyago. Nasiring nga mahusay yana hin duro?
— Oy! oo! mahusay hin duro ngan buutan! — Binmaton an batan'on hinilom in usa nga hayhay.
Ginkinita anay ni Salome, katima tumungok han ulo.
Kun hi Elias waray pagkikinita han mga dampog nga kun nakukulop na nahihimo nga mga dagway nga urusahon, nakakakita unta nga hi Salome tinuruan hin duha nga luha dida han iya mga mata ngadto han gintitinahi. Yana an lalaki in una magyakan kay binmuhat ngan sumiring:
