An tigurang nalilibang kaupay han iya buruhaton nga waray sabot han pagsaka han batan'on kun diri dida na han pag-ilulusad hini kay diri na la buot magsamok ha iya.
— Ada! Kay nakada ka ngayan? —ginkinita hi Ibarra nahapapahungat.
— Pasaylua ako, —binmaton, —naabat ako nga may ada mo buhat...
— Oo, nagsusurat ako, kundi diri kairikagan, karuyag ko man ngani pumahuway. Ano in aton?
— Damo la! —ngani Ibarra nga nagtiharani; kundi...
Ngan pagkinitaon an basahan nga nakada ha lamisa.
— Uy! kay ano? —nahatingala hiya; — Nanunupat ka hin mga heroglipiko?
— Diri! — binmaton an tigurang nga dinmuhol ha iya hin lingkuran; — diri ako nasabot han pinulungan nga ehipsiyo, bisan an kopto, kundi nasabot ako hin gutiay han kasurat nira, salit asya akon ginagamit ha pagsurat, an heroglipiko.
— Nasurat ka bin heroglipiko? Kay ano? — nakapakiana an batan'on waray tutuod han iya kinikita ug binabati.
— Basi diri ako mabasa yana nga mga adlaw.
Ginkinita hiya ni Ibarra hin tutok, nagpipinanhunahuna an batan'on kun diri ba man gud ada tuyaw adto nga lagas. Gin-usisa niya hin dalikyat an basahan panginano kun diri ba nagbibinuwa, ngan iya kinita didto in mag-upay nga kahimo hin mga mananap, mga balaraw, mga tunga hin balaraw, mga bukad, tiil, kamot, butkon ug iba pa nga magupay nga kahimo.
— Kay ano man in imo pagsinurat kun diri ka buot nga basahon?
— Kay inin akon ginsusurat diri ko ataga hinin aton tulin yana; nagsusurat ako basi ako basahon ha lain nga panahon. Kun mabasa ako yana panununugon inin akon mga basahan, an buhat nga ginginuulan ko ha bug-os nga kinabuhi; kundi an tulin nga may hibaro ug say ha akon makakasabot ug masiring: "Diri ngatanan nangangaturog ha kasisidman han kagab-ihon han aton kaapuyan!" Inin kasurupaton hini nga kasurat asya an makakatalwas hini nga akon buhat dida han kawaray sarabutan han mga tawo, sugad han mga tuluuhan, an katurukibon ug kadiri matul-id
