tungod hin bisan la ano nga bahin, ngan nahanunumdom ako nga waray makausa magbasol nga nagsunod han imo mga sagdon. May ada ko gutiay nga pinananalinguha nga akon yana ginpapalakat ug karuyag ko nga mawaray unta maraot nga makaulang.
Ngan dayon pag-asuyi ni Ibarra han mahatutungod han iya pag-ipagtirindog hin liburan nga iya iginhahalad ha iya higugmaon, ngan iya ginbitaran an nahapapanganga nga pilosopo han mga plano nga tikang ha Manila.
— Karuyag ko nga imo ako sagdunan kun hino an mga tawo nga angay nakon daupon dinhi hini nga bungto basi mahimo ini nga akon panalinguha. Ikaw nakilala han mga umurukoy dinhi; hi ako pag-aabot ko pa la, baga sugad ako hin dumuruong dinhi ha akon tuna.
An tigurang nga Tasyo nagtitinamod han mga plano, luhaon an mga mata.
— Inin imo pinananalinguha asya an akon mga inop, an mga inop hin usa nga makaluluoy nga buang! —nahapagyakan hiya; ngan yana an siyahan nga isasagdon ko ha imo asya an diri nga gayod ha akon pakisagdon!
An batan'on dapit nahapahungat.
— Tungod kay an mga tawo nga tuhay, —nagsiring, dara in mapait nga pagtuyo, —makakasiring nga ikaw liwat buang. Pinakakasiring hinin mga tawo nga an diri nagpapanhunahuna hin sugad ha ira usa nga buang, salit sinisiring ako dinhi nga buang, ngan nagpapasalamat ako tungod hini kay kairo ko! ha adlaw nga ibalik nira ha akon an akon buot, dida hito nga adlaw kukuhaan ako nira han gutiay ko nga kagawasan nga akon ginlukat han akon dungog ha pagkatawo. Ngan tingali la may ira katadungan! Dida hinin akon pag-ukoy ug panhunahuna nalutod ako ha ira; an akon mga lagdaan ngan mga paghingyap lain. Bantog nira nga tawo nga buutan iton gobernadorsilyo nga waray hinbabaruan nga iba kun diri an pagdurot la hin sikulate kan P. Damaso ug pag-ilob han iya maraot nga batasan, ngan yana manggaran na ug nakakahukaw na han pangaturog han iya mga igkasi ngan danay na ngani mahanabi hin pangatadungan. "Ito nga tawo may hibaro," nasiring an mga tawo; "kitaa niyo, kablas la ito anay ngan yana dako na nga pagkatawo!" Kundi ako, nga may ada ko nasunod nga manggad ug pagkatawo, nga nagtuon ako ngan yana waray ko na katigayunan, nga waray ha akon
