233
han mga agian: an alperes linmingat ngan nagupong kun
maguwa ba hiya, kun diri, kundi an magwarali nagtitikang
na hin pamulong hin dako nga tingog nga bug-os ug nag-aaningal: waray ruhaduha, an magmarangno ha iya nga
ginang batid ha panambalan.
-Maranggat ug mapawa an altar, haluag an purtahan nga dako, an hangin amo an sarakyan han banal nga diyusnon nga pulong nga magawas ha akon baba, pamati kamo han mga durunggan ha iyo kalag ug kasingkasing basi an mga pulong sa Dios diri mahulog ha batuon nga tuna ug sibaron han kamanampan ha impyerno, kundi nga tumubo ngan mangudlot sugad hin marahalon nga binhi dida han tanaman han aton talahuron ug langitnon nga amay hi San Francisco!(3) Kamo, dagko nga magpakasasala, nga binihag han moros ha kalag nga asya an naluob han kadagatan han kinabuhi nga dayon, nananakay hin magdig-on nga sakayan han aton mga kaaway nga amo an lawas ug an kalibutan, kamo nga nagkakagagapos han kamagpakimalaw-ay ha lawas ug kaipa ngan nauuripon kamo paggayong han mga barko ni Satanas, an impyernuhanon, tan-awa niyo hin matinahuron nga pagtan-aw an nagluwas han mga kalag dida han kauripon han yawa, an maisog nga Gedeon, an mapintas nga David, an diri lupigan nga Roldan han aton Tuluuhan, an Guardia Civil nga langitnon, nga diri lulupigan han ngatanan nga guwardya sibil nga nag-agi na ngan tidaraon pa, —an alperes dida hini nagkuriot, —oo, ginoo nga alperes, labi kaisog ngan kamakagagahom, kay bisan waray lain nga pusil kundi usa la nga krus nga kahoy, dinadaog an dayon nga tulisan ha kasisidman ngan han ngatanan nga sakop ni Luzbel, ngan iya unta nauubos hin kapoo kun diri la tungod kay an mga manunulay diri mga lawasnon! Ini nga pangasa ha ngatanan nga linarang sa Dios, ini nga katingalahan nga diri sadang matukib, amo an baraan nga Diego de Alcala nga, igpananglit ta hin usa nga pananglitan kay an mga pananglitan nakakabulig hin pagtukib han mga butang nga diri sadang matukib, siring pa han nasiring, liliwaton ko nga ini nga dako nga baraan asya in usa la nga pukis nga sundalo, usa nga magdudurot dida han amon dako nga kompaniya nga tikang didto ha langit pinangunguluhan han aton langitnon nga amay hi San Francisco, nga akon hintitig-uban sugad hin kabo, kun diri man lugaring sarahinto, tungod ha kaluoy sa Dios.
