241
Asya ini an tugon han mga santos nga konsilyo, ngan an
diri magsugot eskomulgado.
—Kun karabaw in sakyan? - nagpakiana in usa nga mahirot nga parauma, han iya katupad.
—Kun amo... padayon la! binmaton an ginpapakianhan nga usa liwat nga balitwaran.
Kundi bisan nagwawalas an magwarali damo la an nanhihimalanga ug nanhihingaturog, kay adto nga wali amo na la gihapon: kanugon la han panharoy ug panuok han pira nga lagas nga babayi tungod han mga sala han mga maglinarisnon, kundi nanmamahuway na la kay waray man ha ira naduyog, Bisan an mao nga Hermana Pute lain an ginpapanhunahuna. May tawo nga nahatutupad ha iya nga tungod kay nahangangaturog, ngada ha iya hipasandig, nakakurumos han iya abito: an buutan nga tigurang pinmurot hin bakya ngan pagsangpiton an tawo hin makmak, dako an tingog:
—Oy, isol, salbahis, mananap, sungayan, karabaw, ayam, kondenado!
Kaiya na gihapon, nasamok. Inmukoy an magwarali, binurarat an mga mata ha paghipausa hadto nga dako nga pagpasipara. An kasina nakapugong han iya pulong didto ha but-ol ngan waray niya nahimo kun diri an pagngurob ngan pagsampok han kamaoo dida han walihan. Kundi na may ada ini dara: binuhian han lagas an bakya, nagnginginurutob, ngan magpinangudos hin nakadamo, linmuhod hin mahadong.
—Aaah! aaah!-- nahapagtingog na ngahaw an padi nga nakugos han kamot ug nagtitinangutango; - amo ito an pulos han pagwinali ko ha iyo dinhi ha bug-os nga aga, mga salbahis! Dinhi ha balay han Dios nag-aaraway kamo ngan nagluluwas hin magraot nga pulong, waray mga alo! Aaah! waray na niyo gintatahod!... amo na ito an kamagpakimalaw-ay ha lawas nga kawaray panhikailob yana nga mga panahon. Nasiring pa ako, aaah!
Ngan igpadayon ini nga yawyaw hin wali ha kanan tunga hin uras. An Alcalde nahagong na; hi Maria Clara naghihituyangko, waray na pakakailob han kapiraw, waray na istampa ug ladawan nga sadang pagkinitaon. Waray na pakakaalantad kan Ibarra an mga pulong ug mga paaliday; say yana niya ginpipinanhunahuna in usa nga balay ha baw-
