rektorsilyo!(5).. Dakpon iton puno nga panday!
—Pandugan!
—Pandugan! Oy, musika, musika! Pandugan ito nga punupuno hin panday!
—Sr. Alcalde, —nagsiring hi Ibarra hin ungud-ungod; —kun an kasamdong diri nakakabanhaw han minatay, diri man liwat an kabilanggo hin usa katawo, ngan diri ta sinasabot kun amo an may sala. Ako an matindog ha iya ngan pinangangaro ko nga pagawson bisan hinin yana la nga mga adlaw.
—Waray sapayan! Kundi, diri na magsuga!
Damo kalain an naglalakat nga hiruhimangraw. An panhunahuna nga namay-milagro tuudtuod na gud. Kundi hi Fr. Salvi baga waray kalilipay hadto nga milagro nga sinisiring nga kanan usa nga santo nga sakop han iya Orden ngan taga dida han iya singbahan.
May ada ngani sinmagbang pagkasiring nga nakakita hiya nga linmugsong ngadto ha kutkot in uusa nga masirom nga sapot sugad hiton kanan pransiskano, dida han panhirun-og gud han ngatanan. Waray iba, hi San Diego. Hinbaruan liwat nga hi Ibarra sinmingba, an madarag nga tawo waray; asya na, waray ruhaduha.
—Nakita ka hito? Diri ka lugaring buot sumingba! nasiring in usa nga iroy ha iya anak;—kun waray ta ikaw paglambaha nga mapirit ka la pagsingba, ikaw in igindudulong yana ngadto ha tribunal, dida hiton karreton!
Matuod man gud: an lawas han madarag nga tawo, pinutos hin panapton ngan luran dida hin usa nga palpag, gindadara ngadto ha tribunal.
Hi Ibarra nagdadagmit ngadto ha ira balay pagliwan.
—Hmhm! Maraot nga pagtikang! —nasiring an tigurang nga Tasyo, nagtitiharayo.
Nag-iikahuruman na pagliwan hi Ibarra nga pasabuton hin usa nga suruguon nga may uusa katawo nga hurunanon nga may tuyo ha iya.
Isip ni Ibarra nga usa han iya mga tawo salit nagsugo nga palaguson ngadto ha sulod nga iya buruhatan, nga lakip liwat niya barasahan ngan laboratoryo kimiko.
