—Dada, siring nga masakit ako!— nakimaluoy an batan'on nababaraka; —pagpipiriton na man ako pagkanta ngan pagtuktok han piyano!
—Nakagsaad na hi imo tatay, pagpapakaaluhan mo?"(4)
Hi Maria Clara binmuhat, sinmiplat kan iya Dada, linubag an mahusay nga mga butkon ngan magyakan:
—Kun may ada ko la...
Kundi waray tapusa ngan magtikang na la pagliwan.
Karuyag ko igkahimangraw ito nga batan'on! — nasiring hi S. E. ha usa nga ayudante; — nakakaaghat ha akon hin panginano han nasugaran.
— Aadto na, kinukuha, General! Kundi, aadi in usa nga batan'on nga taga Manila nga nagpipirit nga katugutan pag-atubang ha imo. Amon na ginsiring nga hi V. E. damo in libang ngan an imo pagkanhi diri kay pagkarawat hin mga tawo kundi pagkita la han bungto ngan han prosesyon; kundi nagbaton la nga hi V. E. kinahanglan pumakalibang madaliay bahin ha paghatag hin mga katuhayan...
Hi S. E. linmingi ngadto han Alcalde, nahatitingala.
—Kun diri ako nagsasayop,— binmaton ini, tinmango hin gutiay, asya ito an bagongtubo nga iginkasuhay kanina han aga ni P. Damaso mahatungod han wali.
—Lain liwat? Tuyo hito nga prayle an pagsamok hinin lalawigan, o bangin nakakasiring nga hiya amo an may pagburut'an dinhi? Sidnga ito nga batan'on nga umuswag!
Hi S. E. nangalas, naglinakatlakat patapustapos han ruwang.
Didto ha may hagdan may pipira nga kakatsilaan ngan hin mga militar ngan mga punuan han bungto ha S. Diego ngan hin mga bungtuhanon man; namamaghurungko paghiruhimangraw o paglantugi. Nakadto man liwat an ngatanan nga prayle nga karuyag man managhatag hin katalahuran kan S. E., an kulang la didto hi P. Damaso.
—Hi S. E. an Capitan General nangangamaya ha kanda VV. RR. nga umangan-angan madaliay,— nagsiring an ayudante; —dayon ikaw, batan'on.
An taga Manila nga nagsiring nga diri maaram hin
