in usa nga buhok ha imo ulo hamtang ako pa an mamumuno dinhi hini nga Kapurupud'an; ngan mahatungod man liwat han imo ekskomunyon ako in maaram makighimangraw han Arsobispo, kay kaangayan mag-alagad kita han kabatasanan dinhi: dinhi diri kita makakahimo hin pagtawa, hini nga tulos, ha kadam'an, sugad didto ha Peninsula o didto man han tukib na nga Europa. Dida hini angay
ka magmahiniruton na ha sunod nga mga adlaw; say mo niyan iginkakaaway an mga Katig-uban han Kapadian nga, tungod han ira gahom ug kasalapian, angay pagtahuron. Kundi tatabangan ta ikaw kay naruruyag ako hadton magupay nga anak, karuyag ko nga pagtahuron an ngaran han mga kag-anak; hi ako nahagugma man ako han akon kaganak ngan, ambot la han Dios! kun ano in binuhat ko kun ako in ginsugad ha imo...
Ngan balhinon hin tigda an himangraw, nagpakiana:
—Nasiring nga tikang ka ha Europa; nahangadto ka ha Madrid?
—Oo, may kanan pira kabulan.
—Waray ka didto pakabati hin himangraw mahatungod han akon panimalay?
—Diri pa la maiha nga nagikan hi V. E. nga igpakilala ako ha ira.
—Ta, kay ano man nga waray ka pagdara nganhi ha akon hin pagpakilala ha imo?
—Senyor, binmaton hi Ibarra nga dinmuko, — tungod kay diri ako yana tikang ha Espanya ngan tungod man liwat kay ginhimangrawan ako mahatungod han imo gawi, nakahunahuna ako nga in usa nga surat nga pagpakilala ha akon ha imo diri la kay waray gamit, kundi bangin pa ngani makasina: kami an mga pilipinhon ngatanan igintugon ha imo pagpakilala.
Usa nga hiyom inabat ha mga im-im han tigurang nga militar nga namulong hin hinay sugad hin nagsusukol ug nagtitirutimbang han iya ginyayakan:
—Malipay ako nga nakapanhunahuna ka hin sugad ngan... matuod man gud! Kundi ikaw, batan'on, angay ka masayod kun ano an mga turumanon nga amon gindadara dinhi ha Pilipinas. Kami dinhi, mga tigurang nga militar, kami an ngatanan ngan amon an ngatanan nga buruhaton: Hadi, Ministro ha Panggawian han Bungto, ha Away, ha
