an dominiko nga tungod hin paghingadto ha Hongkong maaram magyakan han sinisiring nga Pidgin English(11) iton dapit linangka nga kainingles hiton mga anak han Imperio Celeste.
Usa ako katuig ha Inglaterra kaupud-upod hin mga tawo nga waray iba nga yinaknan kun diri iningles la.
—Ngan ano man nga tuna didto ha Europa an imo labi nga naruruyagan?— nagpakiana an mabulaw nga batan’on.
—Labot han Espanya nga asya an ikaduha ko nga lugaringon-tuna, bisan hain hiton mga tuna didto han talwas nga Europa.
—Ikaw nga naghingarungadto ha higrayo . . . hala daw, kitaon ta, ano an baga labi kamaupay nga imo didto hinkit’an? — nagpakiana hi Laruja.
Hi Ibarra baga nagpinanmurubuot.
—Maupay? Mahatungod hin ano?
—Pananglit ... an mahatutungod han mga kaagi han mga bungto ... an ira lakat ha panggawian, ha panugtanan, ha tuluuhan, an ha talig-unay, an ha kasahiran, an ha kabug-usan . . .
Hi Ibarra nagpainuino anay hin maiha.
—Ha huyayag nga sumat, an katingalahan la hito nga mga bungto kun kuhaon anay an kinalugaringon nga paggasad . . . Ugsa ko kinakadto in usa nga tuna, gintatalinguha ko anay pagtun’i an iya kaagi, an iya tinikangan sidngon ta na, ngan unina inaabat ko nga ngatanan kinaiya; inaabat ko nga an kahuraan o kakablasan han mga bungto iginkakairigo gihapon han lakat han ira kaluwasan o kauripnan, sugad han kamainalinsakubon o kaawaanon han ira mga gin-gikanan.
—Ngan waray mo na hinkit’an nga iba kun diri ito la?— pinmakiana, nagtitinawa hin pakatamay, an pransiskano nga tikang han pagtikang han panihapon waray gud pagyakan bisan usa kapulong, nalilibang tingali han pagkinaon. —Diri tuang han pag-inubusa mo didto han imo salapi kun amo la nga hinbaruan! Bisan hino hito nga bata ha liburan maaram!
Hi Ibarra nagkinita na la ha iya, waray na hibaro kun ano an sadang pamulungon. An iba nanhipahungat, nagkikinita han duduha ngan namamaghirot nga mamay-makaaalo nga aringasa. An batan’on naisisiring na unta: “An panihapon nag-iikahuruman na ngan hi Fr. Damaso busog
