p... paagia ako, kun diri pamimiulan ko ikaw!—nagwawalas an alperes. ginpapamumukpok ngan ginpapamamanyakan an sada.
Hi Da. Consolacion waray babaton. Nababati in hinarangkaol hin mga lingkuran ug mga kaban daw sugad hin kanan nagtitinambak hin mga garamiton ha panimalay nga igin-uulang hin usa nga agian. An balay nauyong tungod han mga banyak ug mga panampalas han bana.
Ayaw ngadi, ayaw ngadi! —nasiring an maasgad nga tingog han babayi; —pupusilon ko ikaw, humangaw ka la.
— An lalaki baga nagtikahagkot hin hinayhinay ngan nag-ilob paglinakatlakat na la dida han ruwang, sugad hin usa nga mananap ha sakob hin tangkal.
— Kadtuna, lusad ngan magpahagkot hiton imo ulo!— nagsisinunglog ha iya an babayi nga nakakatima na ada han iya pangandam ha away didto ha sakob.
— Ambot la ha imo, hikaptan ta ngani ikaw diri ka na hikikit'an dinhi ha kalibutan, baboy, p...!
— Oo, pagpatakas la dida hin yawyaw. . ., diri ka naruruyag nga sumingba ako! Diri ka buot nga magtuman ako sa Dios! an mga pulong nga pag-unggit nga adto la nga babayi in maaram magluwas.
Pinurot han alperes an iya kapasete, naghingayad anay han iya tindog ngan lumusad, dagko an piktaw, kundi han kahagos hin pira kadali binmalik hin waray aringasa, kay nagtalo han botas. An mga suruguon nga hiara pagkulaw hini nga mga kiritaon danay pannguyaman, kundi adto nga bag-o nga tulos pagkuha han botas nakaaghat ha ira, salit naggipakirukiro.
Linmingkod an alperes ha usa nga lingkuran ha harani han birilhon nga purtahan ngan nakailob paghinulat didto hin kanan kapin hin tunga hin uras.
— Linmusad ka man gud hin inungod, o aada ka la nalingkod, nga sungayan ka? —nagpapanalagsaon hin pakiana an tingog tikang didto ha sakob, gin-iibaiba an panngaran ngan gintitidako an tiluka.
Ha katapusan nagtikang an babayi hin panguha han mga ulang ha agian; an lalaki man ha gawas nagpipinamati han kinaradol ngan nahakakalipay.
— Katabang, linmusad an agaron? —sinmiyabaw hi Da. Consolacion.
