tungod han kapadian. An diri buot ha iya makighirani diri dumuok ha iya; hi Sr. Ibarra diri man nagpapamirit hin pakighirani.
— Kundi ini paghatag hin higayon nga mamay-katarag man, ngan an nagbibiling hin kataragman aadto paghihikaraot!(2)
— Waray ko kinikita nga kataragman, padre; an Alkalde ug an Capitan General, nga akon mga labaw, nakig-upodupod ha iya hini nga bug-os nga kulop ngan diri ako asay ha ira magsususon.
— Kun diri mo dinhi pagagawson magkakalakat kami.
— Ikabibido ko hin totoo, kundi diri ako makakagpagawas dinhi hin bisan hino.
Nagbasol an padi, kundi diri na niya mahihimo an pag-isol. Pinasabot niya an iya kaupod nga binmuhat hin pirit ngan hira nga duha nagkalakat. Sinmubad an mga paraburubunyog ha ira kundi naniplat anay kan Ibarra dara han ira kangaralson.
An mga higawhigaw ug mga guruguro dinmugang: may nanaop nga mga tawo ngan nakigkatahod han batan'on ngan namagsiring.
— Aada kami ha imo; ayaw la hito pag-asa nga mga tawo!
— Kay hira hino ito? —nagpakiana hin ha paghipausa.
— Adton namagkalakat: namamaghirot nga igkatarampo ha imo!
— Naghihirot nga igkatarampo ha akon? Ha akon?
— Oo, kay nasiring nga eskomulgado ka na kuno.
Hi Ibarra, dako an paghitingala, waray nahipagsiring nga bisan ano; naniplat ha mga luyuluyo niya. Nakakita kan Maria Clara nga natago han iya bayhon ha luyo han iya paypay.
— Kundi, tuod ngayan ini? — nakagmugo katapos; — aadto pa ngayan kita ha Edad Media? Ngayan kun sugad... —
Kundi binalhin an tingog ngan daupon an kadaragan'an; — pasaylua ako niyo,— nganiya may ada ko ngayan kasabot pakigkita; mabalik na la ako pakig-upod ha iyo unina.
— Ayaw paglakat!-ginsiring ni Sinang: - sasayawon ni Yeyeng an "La Calandria"; makaruruyag hin duro sumayaw.
— Diri ko mahihimo, sangkay, kundi mabalik na la ako.
