kob han iya bahol ug kubalon nga dagway waray may natuod nga may ada ngayan niya kasingkasing.
Hi P. Damaso waray na pakailob, pinmaharayo hiya didto han masakit ngan magtinangis sugad hin bata. Napasingadto ha suy-ab ngan buhian didto an iya mga kabido ha tungod han minayuyo nga mga balagon dida ha may hangbuyan ni Maria Clara.
—Nahagugugma gud man hiton iya anak ha bunyag! -an isip han ngatanan.
Hi Fr. Salvi nagkikinita la ha iya, waray yakan-yakan ngan nananakmol han iya mga im-im.
Han baga paghinugay han iya kabido, iginpakilala ha iya ni Da. Victorina an batan'on nga Linares nga, matinahuron, nagtiharani.
Ginkinita hiya anay ni Fr. Damaso hin hilom, tikang ha ulo ngadto ha tiil, ngan karawton an surat nga idinuduhol ha iya ngan basahon hin waray hiya sabot ada, kay nagpakiana:
—Ngan hino ka man?
—Hi Alfonso Linares, anak ha bunyag han imo bayaw...-nagyakan an batan'on.
Hi P. Damaso tinmiad han lawas ngan magkinita liwat han batan'on ngan tumukdaw, dara in kalipay ha bayhon.
—Aw, amo ka ngayan an anak ha bunyag ni Carlicos? — sinmiring ngan makighangkupay; kadi ha akon mga butkon...kinmarawat ako hin iya surat may pira na kaadlaw... amo ka ngayan! Waray ako ha imo kilala... matuod waray ka pa ngani katatawo nga lumakat ako didto; waray ako ha imo kikilala!
Ngan ginakos ni P. Damaso han iya magbakod nga mga butkon an batan'on nga namumula, ambot kun dara hin kaalo, o dara ba hin paghiutki. Hi P. Damaso baga sugad hin nahangalimot na han iya kasakit.
Katapos han siyahan nga mga paghinangop ngan katima han mga kinahanglanon nga pamakiana mahatungod kan Carlicos ngan hi Pepa, sumukna hi P. Damaso.
—Ta, yana! ano man in karuyag ni Carlicos nga bubuhaton ko ha imo?
—Sabuot ko aada hiton surat nahaaasoy . . .—binmalik pagyakan hi Linares.
—Ha surat tuod? Matuod man gud! Ngan karuyag nga igbiling ta ikaw hin susudlan nga buhat ngan hin asa
