Haglaba nga mga adlaw ngan magsamdong nga mga gab-i an pinamag-ilob ha may uluhan han higdaan; hi Maria Clara nahabughat kahuman la pagkumpisal ngan dida han lingaw hiya say la niya naluluwas an ngaran ni iya nanay nga waray niya hikilal'i. Kundi an iya kasangkayan, an iya amay ug an dada namamag-inagma ha pagmangno ha iya; kadam'an an mga pamisa ug mga limos nga iginpadara ngadto han ngatanan nga mga milagroso nga ladawan; hi Kapitan Tiyago nagsaad pag-ayog hin tungkod nga bulawan ha Virgen ha Antipolo, ngan ha katapusan an hiranat nagtikang hin paglungas hin hinayhinay, kundi unob.
An doktor de Espadana nahapausa han gahom han jarabe de altea ngan han linaso nga liquen, mga tambal nga waray gud niya liwani. Hi Da. Victorina nalilipay gud kaupay han iya bana nga hadto hin usa kaadlaw nga hintamakan han piol an ikog han iya bata, waray niya agawi han kuhakuha nga ngipon, sugad han iya batasan nga pagpahamaan, kundi iya la ginsiring:
-Kun diri ka pa piol hintatamakan mo pati an akon korse! Usa kakulop, han pagkadto nira Sinang ngan hi Victoria paglaoy han ira sangkay, naghihiruhimangraw ha komedor, hamtang namamahaw, an padi, hi Kapitan Tiyago hi doktor de Espadana ngan hi Da. Victorina.
—Ada, ikinabibido ko, nasiring an doktor; —ngan mabibido man liwat hi P. Damaso.
—Ngain kuno adto babalhina? - nagpakiana hi Linares han padi.
—Ngadto ha lalawigan han Tayabas! —binmaton ini hin kinahubya.
—An mabibido gud hini kaupay asya hi Maria kun habaro, - ngani Kapitan Tiyago; - baga sugad la niya hin anak.
Liniparuan hiya ni P. Salvi.
—Sabuot ko, padre, nagpadayon hi Kapitan Tiya- go, —ini nga sakit gumikan la didto han nahinabo nga maraot hadton patron.
—Amo man iton akon naiisipan, ngan maupay nga waray mo tuguti hi Go. Ibarra hin paghimangraw; naghihimadarako.
