ngadto ha kahiladman han tuna. An manguna, nga batid
han dalan, nagtugon anay han paraulin han mga pag-aagian
nga angay lusaron, angay iubo han ulo, o angay man igkamang; kundi waray kaiha inmabot hira ngadto hin baga ruwang nga linawagan hin agupit ngan ginhuhurungkuan hin
nanapulo kagduha, o nanapulo ba kaglima katawo nga may
mga salsalon, maghugaw an dagway ngan magpakaharadlok an pamanapton, may nagkakalingkod, may nagkakahigda, ngan an tuman la nga naghihiruhimangraw. Nanininangko dida hin usa nga bato nga pinakalamisa ngan nagkikinita han suga nga an tuman la nga nakakapawa tungod
han duro nga aso, may uusa katawo nga masamdong an
pamayhon, binutok an ulo hin dugnit nga duguon: kun diri
la kita maaram nga usa adto nga lungib hin mga tulisan makakasiring kita, ha pagsiplat han kamasulub'on han nawong hadto nga tigurang, nga asya adto an Torre del Hambre han kinabuwasan han pagsibara ni Ugolino han iya
anak.
Han pag-abot nira Elias ngan han iya mag-uruna, an mga tawo nagkabuhat, kundi ha usa nga sinyas han manguna nangukoy, namagkinita na la han paraulin nga waray dara nga hinganiban.
An tigurang linmingi hin hinayhinay ngan nakasiplat han mananong nga panagway ni Elias nga, waray kalo, nagkikinita ha iya, puno hin kasamdong ug katutugkaron han pangahimo.
—Hi ikaw ngayan? —nagpakiana an tigurang nga naginmalipayon an paniplat han pakakilala han batan'on.
—Agi, inin imo kamutangan! —nagmugo hi Elias hin gutiay nga tingog ngan pinmiling.
An tigurang tinmungok, waray pagyakan, sinminyas han mga tawo nga managkabuhat dayon ngan magkalakat, kundi naniplat anay han piloto, dapit pagbanabana han iya kahitaas ngan kamabakod.
—Oo! —ngani han tigurang kan Elias, han duduha na la hira; —mga unom kabulan anay, hadto han pagpasak'a ko ha imo ha akon balay, hi ako an napapaid ha imo; yana nagkakabalyo an palad ngan ikaw na in napaid ha akon. Kundi, lingkod ngan pagsumati ako kun pinaunano mo in pag-abot nganhi.
—May napulo na kaglima kaadlaw ngada yana tikang ako nahababaro han imo nasugaran, —binmaton an ba-
