rot nga kurusan ha talikuran, binmirik dayon ngan umatubang. Pinudkan dayon han pula hin mabaskog, kundi nangaway hin maupay, waray kalisang: sanglit man gud kay amo an pinili han kadam’an. Ngatanan an nagkikita pinanngungulba, ginsusunod hin siplat an kahimtangan han away, may talagsa nga nakakaguliat hin diri tinuyo. An tuna naluluob hin magpula ug magbusag nga barahibo nga mga duguon: kundi an away diri kay tubtob la ha panhidug’i; an pilipino, dapit pagsunod han mga balaod nga iginlalagda han Gobyerno, karuyag nga tubtob may mamatay o may dumalagan man. An dugo nagsasarang na ha tuna, masukot an purok, kundi an pagidaog waray pa gihapon sasabuta. Ha katapusan, daw urhi nga kusog, pinmurok an ugis ha pagpukpok hin amo na la, idinulot an iya bulang ha pako han pula ngan ginmuot ha mga tulan; kundi an ugis samad ha dughan ngan hira ngaduha magkasi guol, pinupunaw. Naghihingahinga, nagkakagungot, waray pamagkiwa tubtob han paghiparugmok han ugis, nga sinmuka hin dugo, nagkisikisi ngan magtinghak; an pula, ginuguutan ha pako, inmilob pa, kundi ha hinayhinay nagtikapuklid ngan magtikapiyong an mga mata.
Dida hini ginlalarang han sentenciador nga say nagdaog an pula, sugad han nahaaangay han mga lagdaan han Gobyerno; ini nga paghukom sinunod dayon hin gugliat nga diri tupngan, gugliat nga maiha, halaba, waray pugtas ngan nadungog ha bug-os nga bungto. An nakabati didto ha hirayo nasabot nga an dejado amo in nagdaog, kay kun diri, an gugriya diri maiha. Asya in nahananabo han mga nasod: an gutiay nga nakakadaog han dako, nagkakanta ug nagbabahan han iya pagdaog tubtob ha kadayunan.
—Kitaa daw hito! — nagsiring hi Bruno ha iya bugto, may dara nga kaurit;— kun tinmuod ka ha akon may ada unta kita yana uusa kagatos kapisos: ikaw gud in sayop hinin kawaray ta bisan guti.
Hi Tarcelo waray baton, kundi naniplat ha iya mga luyo hin an tuman la nga pinupukrat an mata, sugad hin may ada niya ginbibiling nga tawo.
—Aadto iginhihimangraw kan Pedro, — pulong ni Bruno; —nahatag hin kuwarta; kadamo hin salapi!
Matuod man gud, hi Lucas nag-iinihap hin salapi dida ha palad han bana ni Sisa. Naggihuringhuring anay ngan magbulag, ngaduha ha ira magkasi hin-upayan.
