Hi Tarcelo namurubuot: nahagugugma hiya han iya manghod ngan han uyag. Diri niya mahihimo pagpabay'an salit nagsiring: ―Ta. oo!
Dinaop nira hi Lucas nakakita ini ha ira nga nagtitidaop, nahakalipay.
-Agurang! (6) gintawag ni Tarcelo.
-Ano?
-Pipira imo ihahatag? nagpakiana an duha.
-Ginyakan ko na: kun mapatapod kamo pagbiling pa hin iba nga maupod pagsaka hiton kuwartel, tatagan ta kamo ngaduha hin tagkatluan kapisos, ngan napulo an tagsa nga umupod. Kun magmaupay an lakat ngatanan, tagsa ha iyo makarawat hin gatos, ngan kamo doble: hi D. Crisostomo salapian.
--Uyon!-- sinmiring hi Bruno; iduhol na iton kuwarta.
--Nasiring pa ako nga mag-isog kamo sama han iyo amay! Kadi kamo bangin kita hibatian hiton namagpatay ha iya!-- pulong ni Lucas nga tinmudlok ngadto han mga sibil.
Ngan dad'on niya ngadto hin usa nga piliw, iya gintugon hamtang gin-iihapan han salapi.
-Buwas han aga maabot hi D. Crisostomo may dara nga mga pusil; isangbuwas han gab-i, ha may mga ikawalo an takna kadto kamo ha panlubnganan kay didto ta kamo pagsusumati han iba nga mga tugon. Makakagbiling pa kamo hin iba nga mga kaupdanan.
Nagburublag hira. An duha nga magbugto baga in nagbalyo hin pamahungpahong: hi Tarcelo an waray kaalantad, hi Bruno ginduduas.
Hamtang nabulang hi Kapitan Tiyago han iya buranting, hi Da. Victorina nasudoy han bungto pagkita kun tipaunano an panimalay ug panguma han mga hubya nga indiyo. Nagsul-ot han labi niya kamakairindig nga panapton, binawbawan an bata nga seda han ngatanan nga laso ngan bukad, basi hiya ikatag-ob han mga taga lalawigan ngan basi man liwat sabuton nga dako kaupay an ginkakaantawan hadto nga mga tawo ngan han iya marahalon nga pagkatawo, ngan makigkab-it han iya bana nga piang, pinmarayaw ha
